Bugun, 20-sentabr kuni Energetika vazirligida mamlakatimiz mustaqilligining 31 yilligi munosabati bilan “Mustaqillik – eng ulug‘ va eng aziz neʼmat” shiori ostida “Davlat tiliga eʼtibor – mustaqillikka eʼtibor” mavzusida maʼrifat soati o‘tkazildi.
Unda Energetika vazirligi va vazirlik tizimidagi tashkilotlar, O‘zbekiston energetika, neft-gaz va geologiya xodimlari kasaba uyushmalari Respublika kengashi masʼul xodimlari ishtirok etdilar.
Tadbirda Vazirlar Mahkamasining Maʼnaviyat va davlat tilini rivojlantirish masalalari departamenti bosh mutaxassisi G‘.Hamrayev, Davlat tilida ish yuritish va malaka oshirish markazi rahbari I.Azimov, Vazirlar Mahkamasi huzuridagi O‘zbek tilini rivojlantirish jamg‘armasi direktori A.Iminov o‘z chiqishlarida mustaqillik yillarida erishilgan yutuqlar, davlat tili maqomi berilgan o‘zbek tiliga keyingi yillarda yurtboshimiz tashabbusi bilan berilayotgan alohida eʼtibor tufayli amalga oshirilgan keng ko‘lamli ishlar haqida atroflicha to‘xtaldilar.
Tadbirda taʼkidlanganidek, so‘nggi yillarda barcha sohalar qatori energetika sohasida ham keng ko‘lamli ishlar amalga oshirilmoqda.
Davlatimiz rahbarining joriy yil 1-avgustdagi 340-sonli qarori bilan “Yangi O‘zbekistonda el aziz, inson aziz” degan bosh g‘oyani o‘zida mujassam etgan tashkiliy-amaliy, maʼnaviy-maʼrifiy hamda targ‘ibot-tashviqot tadbirlari yuqori saviyada o‘tkazildi.
Mustaqillik bayramiga tayyorgarlik ko‘rish va uni yuqori saviyada o‘tkazilishida energetika sohasi xodimlarining ham beqiyos o‘rni mavjudligi alohida taʼkidlandi. Xususan, bayram kunlari isteʼmolchilarning energiya resurslari bilan barqaror taʼminlash maqsadida vazirlik va tizim korxonalarida tunu-kun ishlaydigan navbatchilik brigadalari, energetika obyektlari zarur texnika va jihozlar bilan to‘liq taʼminlangani qayd etildi.
Shuningdek, yurtimizda yana bir ulug‘ sana – O‘zbek tili bayrami yaqinlashmoqda. Tadbirda 2020-yil 10-aprelda “O‘zbek tili bayrami kunini belgilash to‘g‘risida” O‘zbekiston Respublikasi Qonuni qabul qilingani, unga ko‘ra, 21 oktyabr – O‘zbek tili bayrami kuni etib belgilanligi, bu o‘z navbatida yurtimizda O‘zbek tiliga berilayotgan alohida eʼtibor ekanligi taʼkidlandi.
Tadbir mehmonlari ishtirokchilarga yurtimizda o‘zbek tilining mavqeini oshirish bo‘yicha amalga oshirilayotgan ijobiy ishlar haqida batafsil maʼlumot berdilar. Shuningdek, energetika sohasida ham o‘zbek tiliga asoslangan sohaviy lug‘atini tayyorlash zarurligi haqida taʼkidlandi.
Tadbir so‘nggida ishtirokchilarga Yangi O‘zbekistonni barpo etish yo‘lida amalga oshirilayotgan ulkan ishlar, solnoma – yurtboshimiz faoliyati xronikasi hamda davlat tilida ish yuritishga oid kitob va qo‘llanmalar sovg‘a qilindi.
O‘zbekiston Respublikasi
Energetika vazirligi Matbuot xizmati
960
