2022-yilning 23-24-sentabr kunlari Toshkent shahrida “Jahonda va O‘zbekistonda past uglerodli rivojlanishning yangi ufqlari” mavzusida xalqaro ilmiy-texnik konferensiya bo‘lib o‘tmoqda. Konferensiya O‘zbekiston Respublikasi Energetika vazirligi va vazirlik huzuridagi Qayta tiklanuvchi energiya manbalari milliy ilmiy-tadqiqot instituti tomonidan tashkil etildi.
Majlisda BMTTD va YETTBning O‘zbekistondagi vakolatxonalari, ixtisoslashtirilgan ilmiy-tadqiqot institutlari rahbariyati aʼzolarining kam uglerodli rivojlanish masalalari bo‘yicha taqdimotlar tinglandi.
Xalqaro forum dasturidan, shuningdek, investorlar va dunyoning yetakchi kompaniyalari taqdimotlari, qayta tiklanuvchi energetika sohasida global va mintaqaviy tajriba almashish ko‘zda tutilgan. Xususan, Texas universiteti (AQSH) Nanotexnologiya instituti vakili yangi avlod quyosh kollektorlarini ishlab chiqarish uchun nanotexnologiyalarni qo‘llash bo‘yicha ana shunday tajribalar bilan o‘rtoqlashadi.
Ikki kun davomida bir qator oliy o‘quv yurtlari va ilmiy-tadqiqot institutlari mutaxassislari kam uglerodli rivojlanish maqsadlariga erishishning zamonaviy yondashuvlari bilan tanishtirdilar. Jumladan, Materialshunoslik instituti, Fizika-texnika instituti va O‘zbekiston Fanlar Akademiyasi energetika muammolari instituti, Toshkent davlat texnika universiteti, Rossiya Fanlar akademiyasining yuqori haroratlar bo‘yicha birlashgan instituti, Sankt-Peterburg politexnika universiteti, Belarus Milliy fanlar akademiyasi energetika instituti, G‘arbiy attika universiteti (Gretsiya) va boshqalar.
Xalqaro ilmiy-texnik konferensiya past uglerodli rivojlanish bo‘yicha jahon tajribasini va ushbu yo‘nalishdagi innovatsion g‘oyalarni birlashtirdi, ilmiy fikr va amaliy yutuqlar hamjamiyatini yaratishga imkon berdi, bu esa mamlakatda yashil iqtisodiyotni rivojlantirish, issiqxona gazlari chiqindilarini kamaytirish va boshqa sohalarda yangi loyihalarni rejalashtirish hamda amalga oshirishga xizmat qiladi.
O‘zbekiston Respublikasi
Energetika vazirligi Matbuot xizmati
879
