Ijtimoiy tarmoqlarda Farg‘ona viloyatining O‘zbekiston tumanida elektr energiyasi va tabiiy gazdan qarzdorligi mavjud isteʼmolchilarga tegishli chora ko‘rilmayotganligi to‘g‘risida murojaat eʼlon qilindi. Ushbu murojaatga asosan quyidagilarni maʼlum qilamiz.
O‘zbekiston tumanida qurilish materiallari ishlab chiqaruvchi “Great Silk Road Servis” MCHJ (“Greksil”)ning bugungi kunda foydalangan elektr energiyasidan 1 761,3 mln so‘m qarzdorligi mavjud bo‘lib, mavjud qarzdorlikni undirish maqsadida “Farg‘ona hududiy elektr tarmoqlari korxonasi” AJ tomonidan 2022-yil 26-sentabr kuni “O‘zaro hisob-kitoblarni tartibga solish va qarzdorlikni bartaraf etish etish” yuzasidan talabnoma taqdim etilgan.
“Greksil” tomonidan foydalangan elektr energiyasi to‘lovni o‘z vaqtida amalga oshirmaganligi uchun jamiyat tomonidan 30-sentabr kuni elektr tarmoqlaridan o‘chirilib, elektr energiyasi yetkazib berilishi to‘xtatilgan.
Shuningdek, “Greksil” korxonasi yetkazib berilgan tabiiy gazdan 2022-yil 16-sentabr holatiga 517 mln so‘m qarzdorligi sabab, shu kunning o‘zida tarmoqdan uzilgan.
2022-yil 19-sentabr kuni qayta nazorat qilingan vaqtda, o‘zboshimchalik bilan tarmoqqa ulanib olinganligi aniqlangan.
Holat yuzasidan “O‘zbekistontumangaz” gaz taʼminoti bo‘limi tomonidan joyida dalolatnomalar tuzilib, tabiiy gaz tarmog‘idan uzilgan. Shuningdek, 16 ming 956 kub metr tabiiy gaz sarfi qayta hisob qilib berilgan.
Shuni alohida taʼkidlash kerakki, elektr energiyasi va tabiiy gazdan qarzdor yirik isteʼmolchilarni aniqlash yuzasidan hududlar bo‘ylab tizimli ravishda nazorat tadbirlari olib boriladi va qarzdor isteʼmolchilar tarmoqdan ajratiladi.
Energetika vazirligi Matbuot xizmati
546
