SAVOL: Men xonadonimga quyosh panellari o‘rnatmoqchiman va uni 3 yilgacha foizsiz bo‘lib-bo‘lib to‘lash sharti bilan sotib olmoqchiman. Hududimizda joylashgan banklarga murojaat qilishim kerakmi? Tartibi qanday?
Maʼlumot uchun: Prezidentimizning 2022-yil 9-sentyabrda “Energiya tejaydigan texnologiyalarni joriy qilish va kichik quvvatli qayta tiklanuvchi energiya manbalarini rivojlantirish bo‘yicha qo‘shimcha chora-tadbirlar to‘g‘risida”gi PF-220-sonli qabul qilingan.
Farmonga ko‘ra, 2022 yil 1 oktyabrdan boshlab jismoniy shaxslar mamlakatimizda ishlab chiqarilgan quyosh va shamol elektr stansiyalari hamda quyosh suv isitgichlarini 3 yil mobaynida foizsiz bo‘lib-bo‘lib to‘lagan holda Energetika vazirligi huzuridagi Tarmoqlararo energiyani tejash jamg‘armasining onlayn platformasi orqali xarid qilishlari mumkin.
JAVOB: Platforma orqali quyosh panel xarid qilish istagini bildirgan fuqaro https://energymarket.uz/ platformasidan ro‘yxatdan o‘tishi kerak. Ro‘yxatdan o‘tish jarayonida maxsus anketa savollariga batafsil javob beriladi. Arizani to‘ldirish jarayonida Bitim turi bo‘limidan Muddatli to‘lovga olish qismini tanlash kerak. Shu bilan birgalikda platforma marketpleysida joylashtirilgan qayta tiklanuvchi energiya manbalarini narxi va texnik tafsilotlari bilan tanishib chiqib, o‘ziga maqul bo‘lganini tanlaydi (buyurtma yuboradi).
Ushbu buyurtma ishlab chiqaruvchiga kelib tushadi va ishlab chiqaruvchi tomonidan buyurtmachining (zarur holda birgalikda qarz oluvchi yoki kafil) to‘lov qobiliyati va uskunani o‘rnatmoqchi bo‘lgan joy xam o‘rganiladi. Ijobiy tavsiyanoma berilgan taqdirda uskunalarni bo‘lib-bo‘lib to‘lash sharti bilan Ishlab chiqaruvchi va fuqaro o‘rtasida shartnoma onlayn tarzda imzolanadi. Shartnomada ko‘rsatilgan qaytarish grafigiga asosan buyurtmachi oyma-oy qarzdorliklarni ishlab chiqaruvchiga to‘lab boradi.
Isteʼmolchi tomonidan quyosh panellari yoki quyosh suv isitgichlari sotib olish jarayonida hech qanday tijorat banklariga murojaat qilinmaydi, onlayn platforma orqali barcha jarayonlar amalga oshiriladi. Ishlab chiqaruvchiga ariza kelib tushgan kundan boshlab 10 ish kunida isteʼmolchiga quyosh panellari o‘rnatib beriladi va foizsiz bo‘lib-bo‘lib to‘lash sharti asosida 3 yillik to‘lov grafiki taqdim etiladi.
O‘zbekiston Respublikasi
Energetika vazirligi Matbuot xizmati
2432
