SAVOL: Xonadonimizga quyosh suv isitgich qurilmalari o‘rnatmoqchi edik. Ushbu qurilmaning afzalliklari va ularni xarid qilishda beriladigan imtiyozlar tartibi haqida to‘liqroq maʼlumot bera olasizmi?
BIZNING MAʼLUMOT: Quyosh suv isitgich qurilmalari – qayta tiklanuvchi energiya manbularidan foydalangan holda xonadonlar va iqtisodiyot tarmoqlarida suv isitishni taʼminlash uchun mo‘ljallangan qurilmadir.
JAVOB: Yurtimizda energiya tejaydigan texnologiyalarni va energiya sarfini iqtisod qilishni rag‘batlantiruvchi mexanizmlarni keng joriy etish, muqobil energiya manbalari, xususan, quyosh energiyasidan foydalanishni ko‘paytirish masalasiga alohida eʼtibor qaratilmoqda.
Bugungi kunda 100 va 200 litr sig‘imga ega va 20–24 quvurli quyosh suv isitgichlari mahalliy sharoitda ham ishlab chiqarilmoqda. Qurilmaning qancha quvurlari ko‘p bo‘lsa, qisqa vaqt ichida ko‘proq hajmdagi suvni isitish imkonini beradi.
Shuningdek, mahalliy ishlab chiqaruvchilar tomonidan ishlab chiqarilayotgan suv isitgichlar15–20 yillik kafolat muddatida ishonchli xizmat qiladi.
Quyosh suv isitgichining afzalligi shundaki, u elektr energiyasiz suv isitish tizimi bo‘lib, ortiqcha harajatlarsiz quyosh nurlari orqali xonadonini issiq suv bilan taʼminlab beradi.
Maʼlum imtiyozlarga ega mahalliy ishlab chiqarilgan quyosh suv isitgich qurilmalarini xarid qilish uchun https://energymarket.uz/ platformasida ro‘yxatdan o‘tish kerak bo‘ladi.
Tugallangan buyurtma ishlab chiqaruvchiga yuboriladi va 10 kun ichida qurilmalar ariza beruvchining uyiga o‘rnatiladi. Hozirda platforma test rejimida ishlamoqda. U to‘liq ishga tushirilgandan so‘ng, quyosh suv isitgichi xarid qilmoqchi bo‘lgan fuqaro yuqoridagi manzildagi marketpleys sahifasida ishlab chiqaruvchi tomonidan taklif etilayotgan mahsulotlar haqida batafsil maʼlumot olishi mumkin bo‘ladi.
Ushbu qurilmaning afzalliklari shundaki, kollektordan foydalangan holda isteʼmolchi yilning to‘qqiz oyida suvni isitish uchun elektr energiyasini 100 foiz tejash imkoniyatiga ega. Qish mavsumida 70% gacha energiya tejash imkoniga ega bo‘ladi.
Quyosh suv isitgichlari suvni 100 darajadan yuqori haroratda isita oladi, bu tabiiy gaz, elektr energiyasi va qattiq yoqilg‘iga haqiqiy muqobil bo‘lib hisoblanadi. Buning yordamida qish mavsumida xonadonlari isitish ham mumkin bo‘ladi.
O‘zbekiston Respublikasi
Energetika vazirligi Matbuot xizmati
768
