2022-yilning 14 oktabr kuni O‘zbekiston Respublikasi Energetika vaziri J.Mirzamahmudov va “HuaWei Tech investment Tashkent” kompaniyasi bosh direktori Chen Szyakay boshchiligidagi delegatsiya a’zolari o‘rtasida uchrashuv bo‘lib o‘tdi.
“Huawei” axborot-kommunikatsiya texnologiyalari infratuzilmasi va aqlli qurilmalari sohasida yetakchi kompaniyalardan biri hisoblanadi. Kompaniyaning dunyoning 170 dan ortiq mamlakatlarida vakolatxonalari mavjud bo‘lib, unda 200 000 dan ortiq xodimlar ishlaydi. “Fortune Global” reytingida 96-o‘rin va tadqiqot hamda ishlanmalarga eng ko‘p sarmoya kiritadigan kompaniyalar reytingida esa 2-o‘rinni egallaydi. Statistik ma’lumotlarga ko‘ra, xodimlarning yarmi (54,8%) tadqiqot va ishlanmalar bilan shug‘ullanadi.
Kompaniya 1999-yildan buyon O‘zbekistonda vakolatxonasiga ega bo‘lib, axborot tarqatish va uzatish tarmoqlari bozor ulushining qariyb 70 foizini tashkil qiladi.
Uchrashuvda xorijiy tomon iqtisodiy va barqaror rivojlanish, energiya xavfsizligi, yashil past uglerod siyosatini o‘zida mujassam etgan yangi texnologik yechimlarni taqdim etdi. Xususan, burg‘ulash maydonchalarida sun’iy intellektdan foydalangan holda videotasvirlarni taqdim etish imkoniyatiga ega bo‘lgan Intellektual terminallar, atmosferaga zararli chiqindilarni kam chiqaradigan stansiyalarni yaratishga imkon beradigan, shuningdek neft va gaz konlari uchun raqamli qazib olish, tashish, qayta ishlash texnologiyalari, neft va gazni sotish bo‘yicha yagona raqamli platforma taqdim etildi.
Neft-gaz sanoatini ishlab chiqarishdan yakuniy iste’molchiga yetkazib berishgacha bo‘lgan jarayonlarni raqamlashtirish va avtomatlashtirish, elektromobillarni jamlash uchun elektr quvvatlantirish stansiyalari, shuningdek, karbonat angidrid chiqindilarini sertifikatlash mexanizmlari tizimini joriy etish masalalarini ishlab chiqishda hamkorlik qilish imkoniyatlarini ko‘rib chiqish taklif etildi.
Uzoq muddatli va oʻzaro manfaatli hamkorlikni rivojlantirish boʻyicha kelishuvlarga erishildi, ular uchun yuqoridagi masalalarni amalga oshirish boʻyicha qoʻshma ishchi guruh tuziladi.
O‘zbekiston Respublikasi
Energetika vazirligi Matbuot xizmati
921
