“Issiqlik elektr stansiyalari” aksiyadorlik jamiyati tizimida qayta tiklanuvchi energiya manbalarini bosqichma-bosqich joriy etish orqali ishlab chiqarish samaradorligini oshirish hamda energiya tejamkor texnologiyalardan keng foydalanish borasida ijobiy ishlar amalga oshirilmoqda. Xususan, Sirdaryo IES korxonasida quvvati 1200-1500 kVt bo‘lgan quyosh fotoelektr stansiyasini qurish bo‘yicha dastlabki ishlar boshlandi. Mazkur stansiya ishga tushirilgach, yiliga 3 mln. kVt.soat elektr energiyasi ishlab chiqariladi hamda 900 ming kubmetr tabiiy gaz tejaladi.
Ikki gektar maydonni egallaydigan hamda quvvati 1200-1500 kVt bo‘lgan mazkur quyosh stansiyasini tayyor holda qurib, ishga tushirish (“pod klyuch”) maqsadida “O‘zbekenergota’mir” AJ bilan shartnoma tuzilgan bo‘lib, unga ko‘ra, qurilish uchun ajratilgan yer maydonini tayyorlash, qurilish-montaj va sozlash ishlarini bajarish ko‘zda tutilgan.
Hozirgi kunda bir guruh mutaxassislar tomonidan yer maydonini o‘rganish hamda ob’ektni loyihalash ishlari boshlab yuborildi.
Joriy yilning oktyabr oyi boshida “O‘zbekenergota’mir” AJ tomonidan quyosh panellari metal konstruksiyalari o‘rnatish uchun olib kelindi.
Ushbu ishlardan ko‘zlangan asosiy maqsad - tizimda energiya samaradorlikka erishish, yoqilg‘i-energetika resurslarini tejash va qayta tiklanuvchi energiya manbalarini rivojlantirish orqali mahsulot tannarxini yanada pasaytirishga erishishdir, - deydi “Sirdaryo IES” Texnik ishlab chiqarish bo‘limi boshlig‘i G‘ulom Xolnazarov.
“Issiqlik elektr stansiyalari” AJ Matbuot xizmati
661
