2022-yil 17-oktabr kuni Energetika vazirligida “Golden Horizon Exploration Inc” (Kanada) va “TransAtlantic Petroleum” (Turkiya) kompaniyalari delegatsiya aʼzolari bilan muzokaralar o‘tkazildi.
Yig‘ilishda O‘zbekiston energetika vaziri J.Mirzamahmudov, “Golden Horizon” kompaniyasi prezidenti Vihak Barri, “TransAtlantic Petroleum” kompaniyasi vitse-prezidenti Selami Uras va boshqalar ishtirok etdi.
Muzokaralar chog‘ida Doyaxotin, Kulbeshkak, Xojiqazg‘on, Savatli va Jayhun kabi 5 ta gaz konlarining 3D/4D seysmik tadqiqotlari orqali ishlab chiqarish quvvatlarini oshirish, bosimni ushlab turish texnologiyalarini joriy etish va gaz konlarining ishlab chiqarish quvvatlarini oshirishga qaratilgan loyihani amalga oshirishni jadallashtirish imkoniyatlari va boshqa yo‘nalishlar muhokama qilindi.
Qayd etilganidek, “TransAtlantic Petroleum” 1980-yilda xususiy energetika kompaniyasi sifatida tashkil etilgan bo‘lib, neft va gaz konlarini qidirish, o‘zlashtirish va optimallashtirishga ixtisoslashgan.
“Golden Horizon” portfeliga (1987-yilda asos solingan) xususan Turkiyaning Istanbul shahridan shimoli-g‘arbiy Frakiya havzasidagi yer usti gaz konlarini burg‘ulash va o‘zlashtirish, Norvegiyaning “Statoil” (Equinor) kompaniyasi tomonidan Niderlandiya, Avstriya va Fransiya konlarni o‘zlashtirish, 3D seysmik o‘rganishga qaratilgan loyihalar kiradi.
Uchrashuv yakunlari bo‘yicha loyihani kelgusida amalga oshirish uchun tijorat shartlarini tayyorlash bo‘yicha ishchi guruh tuzish, so‘ngra uni belgilangan tartibda tasdiqlash to‘g‘risida kelishuvlarga erishildi.
O‘zbekiston Respublikasi
Energetika vazirligi matbuot xizmati
599
