Davlatimiz rahbari tashabbusiga ko‘ra, bugundan mamlakatimiz miqyosida ko‘chat ekish bo‘yicha “dolzarb 40 kunlik” boshlandi. “Issiqlik elektr stansiyalari” AJ va tizim korxonalari uning doirasida jami 60 ming tup daraxt ko‘chatlari ekishni rejalashtirmoqda.
Bunda 9 ming tup ko‘chat “Yashil belbog‘”ni yaratish bo‘yicha korxonalar hududi atrofida, 52 ming tup daraxt ko‘chatlari esa “Yashil makon” umummilliy loyihasiga asosan ekiladi. Asosiy e’tibor har bir hududning iqlimiga mos, suvsizlikka chidamli, tez o‘sadigan yaproq va igna bargli hamda mevali daraxtlar ko‘chatlari tanlanishiga qaratiladi. Ayni kunlarda elektr stansiya va markazlarda ko‘chatlarni xarid qilish barobarida, ko‘kalamzorlashtirish ishlari olib boriladigan yerlarni yumshatish, ortiqcha chiqindilardan tozalash, sug‘orish tizimini nazoratdan o‘tkazish kabi ishlar olib borilmoqda.
- Joriy yilning 11 oktyabr kuni Prezidentimiz rahbarligida o‘tkazilgan videoselektor yig‘ilishida “Yashil makon” umummilliy loyihasi bo‘yicha berilgan vazifalar ijrosini ta’minlash bo‘yicha “Issiqlik elektr stansiyalari” AJ tomonidan maxsus dastur ishlab chiqildi. Dastur ijrosi bo‘yicha tizim korxonalarining shaxsan birinchi rahbarlari loyihaning ijrosi uchun mas’ul etib biriktirildi, - deydi “Issiqlik elektr stansiyalari” AJ Ekologiya va atrof muhitni muhofaza qilish bo‘limi boshlig‘i Nargis Valiyeva.
Korxonalar tomonidan nafaqat ko‘chatlarni ekish, balki ularning keyingi parvarishi masalasiga ham alohida e’tibor qaratilmoqda. Xususan, o‘tgan yili “Yashil makon” va “Yashil yillik” loyihalari doirasida yerga qadalgan har bir niholning unib o‘sishi uchun mas’ullar belgilanib, sug‘orish ishlari reja jadval asosida olib borilgan edi. Bu yil ham mazkur ishlar lozim darajada tashkil etiladi.
“Issiqlik elektr stansiyalari” AJ Matbuot xizmati
756
