Ayni kunlarda Energetika vazirligining ishchi guruhlari tomonidan joylarda ijtimoiy soha obektlarining kuz-qish mavsumida barqaror ishlashini tekshirish maqsadida Sog‘liqni saqlash, Xalq taʼlimi, Maktabgacha taʼlim va Oliy va o‘rta maxsus taʼlim vazirliklariga qarashli muassasalarda profilaktik va nazorat tadbirlari olib bormoqda.
Joriy yilning o‘tgan davri mobaynida 646 ta muassasada qozonxona va qozonlar, shuningdek, isitish va gaz taʼminoti tizimlarining texnik holati o‘rganildi.
O‘rganish jarayonida Xalq taʼlimi tizimida 178 ta, Sog‘liqni saqlashda 171 ta, Maktabgacha taʼlimda 35 ta va Oliy va o‘rta maxsus taʼlim vazirligiga qarashli 12 ta muassasada va jami 336 ta ijtimoiy soha obyektida kamchiliklar aniqlandi.
Jumladan, Respublika bo‘yicha 227 ta qozonxona va 1056 ta qozonlarning texnik holati qoniqarsizligi, 206 ta qozon va 777 ta gaz yondirgich nostandartligi, 66 ta muassasaning isitish tizimlari nosozligi hamda 272 ta muassasaning gaz tarmoqlari va gaz taqsimlash qurilmalari texnik talablarga muvofiq kelmasligi aniqlangan.
O‘tkazilgan o‘rganishlar davomida mutaxassislar tomonidan aniqlangan kamchiliklarni tezkorlik bilan bartaraf etish bo‘yicha profilaktik va metodologik yordamlar ko‘rsatib borilmoqda.
Shu bilan bir qatorda, kuz-qish mavsumini betalofat o‘tkazish bo‘yicha belgilangan chora-tadbirlarni to‘liq va sifatli bajarilishini taʼminlash hamda aniqlangan kamchiliklarni bartaraf etish yuzasidan mazkur vazirliklarga tegishli ko‘rsatma va topshiriqlar berildi.
Ijtimoiy soha muassasalarida o‘rganish ishlari davom ettirilmoqda.
Maʼlumot uchun: Ushbu nazorat tadbirlari Vazirlar Mahkamasining 2022-yil 23-sentyabrdagi “Iqtisodiyot tarmoqlari, ijtimoiy soha obyektlari va ko‘p kvartirali uy-joy fondini 2022/2023 yillar kuz-qish davrida barqaror ishlashga tayyorlashni taʼminlash chora-tadbirlari to‘g‘risida”gi 522-son qarori asosida amalga oshirilmoqda.
O‘zbekiston Respublikasi
Energetika vazirligi Matbuot xizmati
748
