Barcha iste’molchi tabiiy gazdan oqilona foydalanishi lozim. Bugun oldimizdagi muhim vazifalardan biri ham aynan energiya resurslarini tejab, undan to’g’ri foydalanish hisoblanadi. Shuning uchun joylarda faoliyat olib borayotgan issiqxona xo’jaligi egalari issiqxonalarni isitishda ko’mir mahsulotlarini ham ishlatmoqda. Jumladan, Romitan tumani “Marziya” mahallasida joylashgan pomidor mahsulotini yetishtirishga mo‘ljallangan 1 gektar yer maydoniga ega issiqxona xo‘jaligida ayni muqobil yoqilg‘i manbalaridan ishlatilmoqda.
Issiqxona xo‘jaligini istishda 2021-yil oktabr oyidan 2022-yil aprel oyigacha “GZK-RETRA 1000-3M” suv isitish qozonida import ko‘mir mahsulotidan yoqilg‘i sifatida foydalanilgan, jami 300 mln so‘mlik 260 tonna ko‘mir sarflangan. Bugunga esa issiqxonada 23 ming tup pomidor ko‘chatlari ekilgan bo‘lib, 2022-2023 yillar kuz-qish mavsumiga tayyorgarlik jarayonlari ko‘rilgan.
Tumanning “Qahramon” mahallasida joylashgan 1 gektar yer maydoniga ega issiqxona xo’jaligida ham pomidor mahsulotlari yetishtirilmoqda. Issiqxonada bo’lganimizda tadbirkor obyektni isitishda o’tgan mavsum davomida resurslardan oqilona foydalangan holda ko’mir mahsuloti bilan isitganligini ta’kidlab o’tdi.
285 tonna ko’mir mahsulotini ishlatib, yaxshigina daromadga ega bo’lganligini ham qayd etdi. Shuningdek, navbatdagi mavsum uchun issiqxonani isitishda import ko’mirdan foydalanilishi borasida tayyorgarlik ko’rilganligini bildirdi.
Keyingi manzilimiz Buxoro tumani “So‘fikorgar” mahallasida joylashgan 1 gektar yer maydoniga ega issiqxona xo‘jaligida bo’ldi. U yerni isitishda 2021-yil oktabr oyidan 2022-yil aprel oyigacha import ko‘mir mahsulotidan yoqilg‘i sifatida foydalanilgan bo‘lib, issiqxonada mavsum davomida jami 250 mln so‘mlik 210 tonna ko‘mir mahsuloti sarflangan.
Issiqxona egasi 78 ming tup qulupnay ko‘chatlarini ekish rejada borligi, bugunga qadar esa 58 ming tupi ekilganligiga e’tibor qaratdi. 2022-2023-yillar kuz-qish mavsumiga issiqxonani isitishda qo‘shimcha import ko‘mir turidan ham foydalanib kelinayotganligining guvohi bo’lishimiz mumkin.
Tabiiy gazdan to’g’ri foydalansak yoki uni ishlatishda tejamkorlikka rioya qilsak, shubhasiz, isrofgarchilikning oldini olinishiga hissa qo’shgan bo’lamiz. Shuning uchun nafaqat aholi, balki ulgurji iste’molchilar ham resurslarimizdan unumli foydalanishi shart. Uni behudaga sarflamaslik asosiy vazifamizdir.
“Hududgaz Buxoro” gaz ta’minoti filiali matbuot xizmati
544
