“Issiqlik elektr stansiyalari” AJ tomonidan 2022-2023-yillar kuz-qish mavsumiga puxta hozirlik ko‘rish maqsadida yoqilg‘ini qabul qilish, saqlash va undan foydalanish tizimi texnik nazoratdan o‘tkazilib, aniqlangan kamchiliklar bartaraf etilib mavsumga shay holatga keltirildi.
Jumladan, elektr stansiyalarning yoqilg‘i ta’minoti ishonchliligini ta’minlash maqsadida “Tolimarjon IES” AJ, Navoiy IES gaz tarmog‘iga qo‘shimcha gaz filtrlarini o‘rnatish, To‘raqo‘rg‘on IES bug‘-gaz qurilmalari gaz siqish kompressorlarini ta’mirlash ishlari yakuniga yetkazildi. Elektr stansiyalarida zamonaviy bug‘-gaz qurilmalari uchun yoqilg‘ining energobloklarga sifatli uzatish tizimi mustahkamligini ta’minlash uchun tabiiy gaz filtrlari zahirasi shakllantirildi.
Elektr stansiyalarida mazut xo‘jaliklari tasarrufidagi yoqilg‘i saqlash va uzatish tizimining rezervuarlari ta’mirlanib, filtr setkalari tozalandi, yangi va zamonaviy nasoslar o‘rnatildi. Mazut qizdirgichlari va boshqa yordamchi uskunalar yangisiga almashtirildi.
- Elektr stansiyalarimizda asosiy yoqilg‘i tabiiy gaz bo‘lishiga qaramay, mazut xo‘jaliklarimizda ham belgilangan chora-tadbirlarni amalga oshirish muhim, - deydi Yoqilg‘i ta’minoti va transport boshqarmasi boshlig‘i Muzaffar Muhiddinov. – Mazut to‘kish estakadalarida 2785 pogonometr temir yo‘l va 9 ta mazut bakining ta’miri amalga oshirildi.
Kuz-qish mavsumida yoqilg‘i tashish yo‘nalishida yuz berishi mumkin bo‘lgan muammolarning oldini olish maqsadida temir yo‘l xo‘jaliklarida ham kapital va joriy ta’mirlash ishlari olib borildi.
Elektr stansiyalari qaramog‘idagi temir yo‘llar ta’miri doirasida 1756 ta yog‘och va temir-beton shpallar yotqizildi.
Bundan tashqari, “Issiqlik elektr stansiyalari” AJ tarkibidagi korxonalarda 7 ta teplovoz mukammal ta’mirlandi.
Bir so‘z bilan aytganda, kuz-qish mavsumi davomida aholini, iqtisodiyot tarmoqlari va ijtimoiy ahamiyatga ega inshootlarni barqaror elektr energiyasi bilan ta’minlash maqsadida, “Issiqlik elektr stansiyalari” AJ korxonalari yoqilg‘i va transport xo‘jaliklari ishonchli ishlashini ta’minlash, shu jumladan, vagon va sisternalarni o‘z vaqtida bo‘shatishga tayyorlash bo‘yicha zarur chora-tadbirlar amalga oshirildi.
“Issiqlik elektr stansiyalari” AJ Matbuot xizmati
1483
