Joriy yilning 27-oktabr kuni O‘zbekiston Energetika vazirligida Latviya Respublikasining O‘zbekiston Respublikasidagi Favqulodda va muxtor elchisi bilan uchrashuv o‘tkazildi.
Uchrashuv chog‘ida xorijiy tomon Latviya Respublikasi energetika sohasidagi mavjud vaziyat haqida maʼlumot berdi, shuningdek, Skandinaviya va Boltiqbo‘yi mintaqalarida muvaffaqiyatli faoliyat yuritayotgan “Tietoevry” kompaniyasi faoliyati bilan tanishtirdi.
Elchi Latviya 2015-yilda elektr energiyasining raqobatli bozoriga o‘tgani haqida maʼlumot berar ekan, u O‘zbekistonda elektr energiyasi bozoriga o‘tish bo‘yicha olib borilayotgan islohotlarini hisobga olgan holda, bu borada tajriba almashishga tayyorligini, bunda meʼyoriy hujjatlarni ishlab chiqish, standartlashtirish, shuningdek, raqamlashtirish bo‘yicha yechimlarni amalga oshirishda ishtirok etish istagini bildirdi.
Unda shuningdek, Latviya tajribasini o‘rganish va ushbu sohadagi hamkorlikning potensial yo‘nalishlarini ko‘rib chiqish taʼkidlandi. Chunki Yangi O‘zbekistonni rivojlantirishning taraqqiyot strategiyasiga muvofiq energetika sanoatini raqamlashtirish ustuvor yo‘nalishlardan biri hisoblanadi.
Uchrashuvda O‘zbekiston energetika sohasida amalga oshirilayotgan islohotlar, xususan elektr energiyasi bozorini liberallashtirish bo‘yicha olib borilayotgan ishlar haqida maʼlumot berildi.
O‘zbekiston 2030-yilga borib mamlakat energetik xavfsizligini taʼminlash maqsadida elektr energiyasi ishlab chiqarish hajmini bugungi kunga nisbatan 2 barobarga oshirishni o‘z oldiga maqsad qilgan. Ushbu rejalarga erishish uchun Energetika vazirligi tomonidan sohani bozor munosabatlariga o‘tkazish maqsadida keng ko‘lamli loyihalar amalga oshirilmoqda.
Dastlabgi islohotlarda “O‘zbekenergo” AJ va “O‘zbekneftgaz” AJ alohida-alohida kompaniyalarga ajratilib, bunda ishlab chiqaruvchi, transportirovka qiluvchi va taqsimlovchi kompaniyalar tashkil etilgani taʼkidlandi.
Energetika sohasida bozor munosabatlari yo‘lidagi muvaffaqiyatli qadamlardan yana biri – DXSH tamoyillari asosida elektr energiya ishlab chiqarish loyihalari, jumladan qayta tiklanuvchi energiya manbalari asosidagi stansiyalarni amalga oshirish bo‘ldi.
Shunday qilib, yangi issiqlik va quyosh elektr stansiyalarning ishga tushirilishi hamda shamol elektr stansiyalari loyihalari bo‘yicha ishlarning olib borilayotgani ko‘p jihatdan mamlakatimiz energetika sohasida ro‘y berayotgan bozor o‘zgarishlariga misol bo‘la oladi.
Alohida taʼkidlash kerakki, xalqaro moliya institutlari ko‘magida DXSH loyihalari tender, yaʼni raqobatbardosh bozor tamoyillari asosida amalga oshirilmoqda.
Ushrashuv yakunida tomonlar O‘zbekiston va Latviya o‘rtasida muhokama qilingan yo‘nalishlar bo‘yicha o‘zaro manfaatli aloqalarni yo‘lga qo‘yishda hamkorlik qilishga kelishib oldilar.
O‘zbekiston Respublikasi
Energetika vazirligi Matbuot xizmati
801
