“O‘zbekneftgaz” AJ tomonidan o‘z vakolatlari doirasida Internet jahon axborot tarmoqlaridagi materiallar tahlil qilinganda, “O‘zbekneftgaz” nomidan investitsiya kiritish va daromad olish hamda pul mablag‘larini jalb qilish bo‘yicha turli xizmatlar taklif qilinayotganligi aniqlanmoqda.
Ayniqsa, so‘nggi vaqtlarda firibgarlar o‘z maqsadlariga erishish uchun “O‘zbekneftgaz” AJ nomidan foydalanishning yangi turli usullarini o‘ylab topishmoqda.
Neft va gaz savdosidan pul ishlash imkonini beruvchi mavjud bo‘lmagan Hukumat qarorlarini mavjud bo‘lmagan platformalarga joylashtirib, unga bag‘ishlangan maqolalarda odamlarga ushbu loyihalarda qatnashib, katta daromadga ega bo‘lishlari mumkinligi vaʼda qilinmoqda.
Firibgarlar foydalanuvchilar soxtalikni sezmasliklari uchun video roliklardan foydalanishmoqda. Shuningdek, loyihada faol ishtirok etishga undovchi mashhur sanʼatkorlarning suratlari va loyiha hamda aksiyalarda ishtirok etib, boyib ketgani haqidagi yolg‘on intervyular nashr etilmoqda.
Shu kunlarda ham www.facebook.com ijtimoiy tarmog‘i orqali foydalanuvchilarga foto va matn ko‘rinishida taqdim etilayotgan reklama xususidagi axborotlarda “2022 yilda aholini davlat tomonidan qo‘llab-quvvatlash maqsadida, “O‘zbekneftgaz”ga 2 mln so‘mdan boshlab investitsiya kiriting va har oy 9-16 mln so‘mdan divident oling” kabi mazmunda maʼlumotlar berilgan hamda ro‘yxatdan o‘tish uchun havolalar ko‘rsatilgan.
Foydalanuvchilarni ishontirish maqsadida, kompaniya logotipi, videoroliklar, davlat ramzlari va shaxslari va boshqa maʼlumotlar ko‘rsatilgan. Shuningdek, fuqaroning shaxsiy va bank kartasiga oid maʼlumotlarni kiritish so‘ralgan.
Bunda, ishonchni suisteʼmol qilish, firibgarlik yo‘li bilan va axborot texnologiyalardan foydalangan holda kiber jinoyatchilikni amalga oshirish, shuningdek, “Shaxsga doir maʼlumotlar to‘g‘risida” O‘zbekiston Respublikasi Qonuni talablariga zid ravishda shaxsga doir maʼlumotlarni transchegaraviy uzatish alomatlari mavjud.
Yuqoridagi kabi faoliyatlarda O‘zbekiston Respublikasi Jinoyat kodeksining 1412, 168, 1881 va 278-moddalarida nazarda tutilgan jinoyat alomatlari, xususan mulkiy manfaat berish bo‘yicha zimmaga majburiyat olish yo‘li bilan jismoniy va yuridik shaxslarning pul mablag‘larini va (yoki) boshqa mol-mulkini jalb etishga doir noqonuniy faoliyatni amalga oshirish, mazkur faoliyatda ishtirok etishga jalb qilish maqsadida ushbu faoliyatni reklama qilish, shu jumladan, ommaviy axborot vositalaridan yoxud Internet jahon axborot tarmog‘idan foydalangan holda reklama qilish, firibgarlik jinoyatini axborot texnologiyalardan foydalanib, sodir etish kabi kiber jinoyatchilik belgilari mavjud.
“O‘zbekneftgaz” AJ bugungi kunda firibgarlar uchun eng jozibador vositaga aylanib bormoqda desak ham mubolag‘a bo‘lmaydi. Kuzatuvlarimizga ko‘ra, yil boshidan buyon “O‘zbekneftgaz” AJ nomidan firibgarlar tomonidan o‘nlab soxta eʼlonlar berildi.
“O‘zbekneftgaz” AJ, uning shoʻba korxonalari va tashkilotlarining axborot resurslari bo‘lmagan veb-saytlarda eʼlon qilingan har qanday maʼlumotlardan foydalanishda ogoh bo‘lishga chaqirilmoqda.
“O‘zbekneftgaz” AJ rahbariyati nomi va logotipidan foydalangan holda tarmoq foydalanuvchilarining huquqlari buzilishini va internet firibgarligi qurboni bo‘lishini oldini olish, salbiy oqibatlarni bartaraf etish, aholining moliyaviy daromadlari yo‘qolishi kabi hodisalar va turli tahdidlarga chek qo‘yish, aholini investitsiya muhitiga, “O‘zbekneftgaz” AJ faoliyatiga bo‘lgan ishonchini yo‘qotmaslik maqsadida, O‘zbekiston Respublikasi Ichki ishlar vazirligiga yuqoridagi kabi holatlarni tezkor ravishda bartaraf etish va aloqador shaxslarga nisbatan tegishli choralar ko‘rilishida amaliy yordam so‘rab murojaat yo‘llandi.
“O‘zbekneftgaz” AJ Matbuot xizmati
794
