Xabaringiz bor, mamlakatimizda ishlab chiqariladigan elektr energiyasining 90 foiziga yaqini issiqlik elektr stansiyalari hissasiga to‘g‘ri keladi.
Kuz-qish mavsumida elektr stansiyalarda ishlab chiqarish quvvatlari barqarorligini taʼminlash, kuzatilishi mumkin bo‘lgan avariyaviy holatlarning oldini olish, ularni tezkorlik bilan bartaraf etish maqsadida “Issiqlik elektr stansiyalari” AJ markaziy apparatida situatsion-tahliliy onlayn-dispetcherlik markazi o‘z faoliyatini olib bormoqda.
Markaz O‘zbekiston Respublikasi Prezidenti tomonidan tasdiqlangan “Raqamli O‘zbekiston – 2 030” strategiyasi asosida tashkil etilgan.
Dispetcherlik-monitoring markazi sutkasiga 24 soat, tunu-kun faoliyat yurituvchi muvofiqlashtirish markazi vazifasini o‘taydi va quyidagi ishlarni amalga oshiradi:
➖real vaqtda issiqlik elektr stansiyalarda elektr energiyasi ishlab chiqarish jarayonini onlayn monitoringini amalga oshiradi;
➖mahsulot tannarxini pasaytirish bo‘yicha elektr energiyasi ishlab chiqarilishi uchun shartli yoqilg‘i sarfi, uning zahirasi nazoratini olib boradi;
➖masofadan turib avtotransport vositalari harakatini, yoqilg‘i saqlash obyektlari faoliyatini kuzatib boradi;
➖avariyaviy holatlar oldini olish maqsadida stansiyalarda tashkil etilgan masʼul xodimlardan iborat, tunu-kun faoliyat yurituvchi qo‘shimcha navbatchilik guruhlari bilan birgalikda ishlaydi;
➖uskunalarning ishonchliligiga taʼsir etuvchi kamchiliklarni aniqlash va aniqlangan kamchiliklarni bartaraf etishda stansiyalarga amaliy yordam ko‘rsatadi;
➖avariyaviy holatlar yuz bergan taqdirda, ularni bartaraf etish bo‘yicha birinchi darajali chora-tadbirlarni belgilaydi hamda tezkorlik bilan bartaraf etish ishlarini tashkil qiladi;
➖elektr stansiyalarda xavfsizlik texnikasi qoidalariga asosan ishni betalofat tashkil etish, ishchi-xizmatchilar salomatligini muhofaza etish choralarini nazorat qiladi;
➖zarur hollarda operativ tarzda sutkasida 24 soat mobaynida energoobyektlarga chiqib boradi, ishlarni muvofiqlashtiradi.
Ushbu ishlarni masofadan turib samarali tashkil etish bo‘yicha markaz zamonaviy axborot-kommunikatsiya uskunalari bilan jihozlangan. Ishga malakali mutaxasislar jalb etilib, ular uchun barcha zarur shart sharoitlar yaratilgan.
Energetika vazirligi matbuot shtabi
1259
