Ijtimoiy tarmoqlarda “Energetika vazirligi huzuridagi “O‘zneftgazinspeksiya” va “O‘zenergoinspeksiya” xodimlariga mukofot pullari to‘lanmayapti” mazmunida maqola eʼlon qilindi.
Ushbu holat aniq manbalar asosida o‘rganib chiqildi va quyidagilar maʼlum qilinadi:
Inspeksiyalar O‘zbekiston Respublikasi Davlat budjetidan moliyalashtiriladi. Shuni inobatga olgan holda, Inspeksiya xodimlariga joriy yilning shu vaqtiga qadar byudjetdan moliyalashtirilishi ko‘zda tutilgan oylik ish haqi, bayram va choraklik mukofot pullari, shuningdek moddiy yordam mablag‘lari o‘z vaqtida to‘lab kelingan.
Murojaatda ko‘tarilgan masalalardan biri – vazirlik huzurida tashkil etilgan budjetdan tashqari jamg‘arma (fond) hisobidan beriladigan “mukofot pullari” (qo‘shimcha rag‘batlantiruvchi to‘lovlar) so‘ngi vaqtlarda haqiqatda kechikayotgan edi.
Energetika vazirligiga yangi rahbar tayinlangandan so‘ng, ushbu muammo Vazir tomonidan o‘rganib chiqildi va qisqa fursatda jamg‘arma hisobidan 6 mlrd so‘mdan ortiq pul mablag‘lari inspeksiya xodimlarini rag‘batlantirish va ijtimoiy himoyasi uchun (“yo‘lkira”, “ovqat puli” va boshq.) to‘lovlar amalga oshirildi.
Bundan tashqari, hozirgi kunda jamg‘armaga tushadigan mablag‘larning aniq manbalari belgilab olindi va uning ijrosi yuzasidan tegishli grafik ishlab chiqildi. Mazkur grafikka asosan, jamg‘arma tomonidan Inspeksiya xodimlariga kechikkan qo‘shimcha rag‘batlantiruvchi to‘lovlar bosqichma-bosqich amalga oshirilmoqda.
Shu bilan birga, maqolada keltirilgan “vazirlik xodimlarining oylik maoshi 30 mln so‘mni tashkil etishi” to‘g‘risidagi maʼlumot haqiqatga to‘g‘ri kelmasligini maʼlum qilamiz.
Energetika vazirligi Matbuot xizmati
353
