Press-tur ishtirokchilari korxonada har birining quvvati 32 MVt bo‘lgan ikkita gaz turbina qurilmasini qurish bo‘yicha amalga oshirilayotgan yirik investitsiya loyihasi, muqobil energiya manbalaridan samarali foydalanish va “Inson qadri uchun” tamoyili asosida qilinayotgan keng ko‘lamli ishlar bilan yaqindan tanishdilar.
Dastavval, ishtirokchilar markazda bunyod etilayotgan har birining quvvati 32 MVtga teng bo‘lgan ikkita gaz turbina qurilmasining qurilish ishlari bilan yaqindan tanishdilar. Turkiyaning “Çalik Enerji” kompaniyasi pudratchiligi asosida barpo etilayotgan loyihaning umumiy qiymati 109,243 million AQSH dollariga teng bo‘lib, 2024-yilga qadar ishga tushirilishi belgilangan. Loyiha amalga oshirilishi natijasida, markaz tomonidan yiliga qo‘shimcha 515,6 million kVt-soat elektr va 690,3 ming Gkal issiqlik energiyasi ishlab chiqariladi. Bunda yuqoritejamkor zamonaviy texnologiyalar evaziga yiliga 219 ming kub metr tabiiy gaz iqtisod qilinadi. Atrof muhitga chiqarilayotgan ifloslantiruvchi moddalar 200,5 tonnaga kamayishiga erishiladi.
Korxonada Prezidentimiz tomonidan muqobil energiya manbalaridan foydalanishni kengaytirish, xususan o‘z ehtiyoji uchun zarur bo‘ladigan elektr energiyasini qayta tiklanuvchi energiya manbalari hisobidan qoplash bo‘yicha berilgan topshiriqlar ijrosini taʼminlash maqsadida amalga oshirilayotgan loyihalar ham press-tur ishtirokchilarida qiziqish uyg‘otdi.
2022-yilning 11 oyi davomida korxonaning bino va inshootlarini issiqlik energiyasi bilan taʼminlash maqsadida umumiy sig‘imi 3400 litr bo‘lgan jami 17 dona quyosh suv isitish qurilmalari, ichki va tashqi hududlarni avtonom yoritish tizimiga o‘tkazish maqsadida 160 dona quyosh panelli yoritish chiroqlari, 70 dona sensorli harakat datchiklari hamda elektrodvigatellarni optimal yuklamalarda ishlashini taʼminlash hisobiga ortiqcha elektr energiyasi sarfini oldini olish uchun 2 dona chastota o‘zgartirgich qurilmalari o‘rnatildi.
Shu kunlarda korxonada quvvati 25 kVtga teng bo‘lgan quyosh fotoelektr stansiyasi o‘rnatilib, ishga tushirildi. Ushbu quyosh panellari orqali yiliga o‘rtacha 45 ming kVt-soat elektr energiyasi ishlab chiqariladi. Natijada yiliga 4,7 ming kub metr tabiiy gaz iqtisod qilinishiga erishiladi. 2023 yil birinchi choragiga qadar quyosh panellarining o‘rnatilgan quvvati bosqichma-bosqich 505,6 kVt-soatga yetkaziladi. Shu tariqa korxonaning o‘z ehtiyoji uchun sarflanadigan elektr energiyasining 20-30 foizga qisqartirilishiga erishiladi. Yiliga o‘rtacha 900 ming kVt-soat elektr energiyasi ishlab chiqarilib, 96 ming kub metr tabiiy gaz iqtisod qilinadi.
Qatnashchilar shuningdek, korxonaning markaziy boshqaruv pulti faoliyati bilan tanishdilar. Bu yerda qish mavsumida aholini barqaror elektr energiyasi bilan taʼminlash maqsadida shtab tashkil etilgan bo‘lib, u sutkasiga 24 soat navbatchilik asosida faoliyat yuritmoqda.
Yil boshida markazda “Inson qadri uchun” tamoyilini hayotga tatbiq etish maqsadida ish reja ishlab chiqilgan edi. Unga asosan ishchi-xodimlarga qulay mehnat sharoitlarini yaratish choralari ko‘rildi. Xususun, xodimlarning salomatligini muhofaza qilish, favqulodda holatlarda ularga sifatli birinchi tibbiy yordam ko‘rsatish uchun avvalgi maʼnan eskirgan tibbiyot punkti qayta rekonstruksiya qilindi. Endilikda xodimlar shinam va yorug‘, barcha kerakli uskunalar bilan jihozlangan yangicha tibbiyot xonasida zarur muolajalarni olishmoqda.
Shuningdek, Kimyo sexi laboratoriyasi, Elektr sexi boshqaruv shiti, Qozon turbina sexi sanuzellari va yuvinish xonalari to‘liq taʼmirlandi, mebel jihozlari yangilandi. Ishchi-xodimlarga munosib sharoitlarini yaratish maqsadida 80 o‘rinli umumiy oshxona qayta rekonstruksiya qilinib, 150 o‘ringa moslashtirildi hamda ishchi xodimlarning talab va istaklarini inobatga olgan holda, zamonaviy mebellar bilan jihozlandi.
Maʼlumot uchun, Toshkent IEM 1939-yilda ishga tushirilgan bo‘lib, poytaxtning asosiy tumanlarini issiqlik va elektr energiyasi bilan taʼminlaydi.
572
