Kuz-qish mavsumida avtobenzin narxini barqarorlashtirish maqsadida 2022-yil 12-dekabr kuni Prezidentimizning joriy yil 10-dekabrdan 2023-yil 1-martiga qadar qator chora-tadbirlarni nazarda tutuvchi maxsus qarori qabul qilindi.
Xususan, ushbu davr mobaynida xorijdan olib kirilayotgan, mamlakatimiz korxonalari tomonidan ishlab chiqarilgan va tadbirkorlik subyektlari tomonidan yakuniy iste’molchilarga sotilayotgan AI-80 markali benzinga aksiz solig‘ining “nol” stavkasi qo‘llaniladi.
Bu belgilangan muddatda benzin narxi barqaror bo‘lishini ta’minlaydi. Mamlakatimizda benzin taqchilligi yo‘q, uning barqaror ta’minoti mavjud, yetkazib berish yo‘lga qo‘yildi, importning ko‘zda tutilgan hajmi barqaror davom etmoqda. Biroq, havo harorati pasayib borayotganidan foydalanib, ayrim tadbirkorlar yoqilg‘i quyish shaxobchalarida sotilayotgan benzin narxini asossiz ravishda oshirish holatlari ham uchrab turibdi.
Shuni unutmaslik kerakki, O‘zbekiston ijtimoiy sohaga yo‘naltirilgan davlat ekan, bunday hollarda foyda ko‘rishga, sun’iy tanqislik holatini yaratishga yo‘l qo‘ymaydi. Ushbu qaror mish-mishlar va shov-shuvlardan daromad topishga urinayotganlar uchun jiddiy to‘siq bo‘ladi.
Shuningdek, avtomashina egalariga shuni eslatib o‘tamizki, benzinni zaxirada xarid qilish va uni yaroqsiz sharoitda saqlash noqonuniy hisoblanadi. Chunki bu nafaqat sizning oila a’zolaringiz, balki yaqin atrofda yashovchi boshqa insonlarning ham salomatligi va hayotiga tahdid soladi. Benzinni faqat shu maqsadda maxsus jihozlangan obyektlarda, masalan, yoqilg‘i quyish shaxobchalarida, terminallarda va hokazolarda saqlash mumkin. Yaqinlaringiz va atrofingizdagilarning hayotini xavf ostiga qo‘ymang.
Aholini benzin bilan ta’minlash holati mamlakat rahbariyati nazoratida.
Eslatib o‘tamiz, benzinni noqonuniy saqlash holatlari aniqlansa, jarima va qonun hujjatlarida nazarda tutilgan boshqa choralar qo‘llaniladi.
O‘zbekiston Respublikasi
Energetika vazirligi Matbuot xizmati
441
