Ўзбекистон Республикаси ИИВ ҳузуридаги Тергов департаментининг расмий веб сайтида, 2019 йил 18 ноябрь куни “Фарғона вилоятида газ сизиб чиқиши натижасида чақнаш содир бўлган ва дастлабки маълумотга асосан бир нафар шахс жароҳат олган” сарлавҳаси билан мақола жойлаштирилган.
Шунингдек, мазкур мақола “Kun.uz”, “Газета.уз”, “Podrobno.uz” интернет веб сайтларида ҳамда бир қатор ижтимоий тармоқлардаги мессенжерларда жойлаштирилган.
Мазкур ҳолат зудлик билан, “Ҳудудгаз Фарғона” МЧЖ томонидан тегишли мутасаддилардан иборат ишчи гуруҳи тузилиб, жойига бориб ўрганилди.
Ўрганиш жараёнида, 2019 йил 18-ноябрь куни соат 10.00 лар чамасида Олтиариқ тумани “Ҳ.Олимжон” МФЙ Азимбоев кўчасида жойлашган 30-сонли кўп қаватли уйнинг 7-хонадонида бахтсиз ҳодиса содир бўлганлиги аниқланди.
“Ҳудудгаз Фарғона” МЧЖ “Олтиариқтумангаз” филиали томонидан аҳоли ўртасида газдан хавфсиз фойдаланиш бўйича тарғибот-ташвиқот ишлари амалга оширилганлигига қарамасдан, Олтиариқ тумани “Ҳ.Олимжон” МФЙ “Азимбоев” кўчасида жойлашган 30-сонли кўп қаватли уйнинг 7-хонадонида истиқомат қилувчи фуқаро Хошимов Икромжон Хусанович, ушбу хонадонга келтирувчи газ қувуридаги жумракни беркитмасдан, табиий газ босимининг нормал бўлишига қарамай, газ ҳисоблагич ускунасини тозалаш мақсадида, ўзбошимчалик билан ечиб, унинг ўрнига “29х1.75/v.95” маркали велосипед резина камерасининг 27 см узунликдаги қисмини улаган.
Газнинг сизиб чиқиш ҳолати борлиги ёки йўқлигини аниқлаш учун гугурт ёқиб текшириб кўрмоқчи бўлганида, хонага тўпланган газ ва ҳаво аралашмасининг чақнаши содир бўлган.
Шунингдек, фуқаро И.Хошимовнинг турмуш ўртоғи О.Хошимова ҳам И.Хошимов газ ҳисоблагич ускунасини тузатиш мақсадида, ўзбошимчалик билан ечганганлигини тасдиқлади. Бу вақтда О.Хошимова бошқа хонада бўлган ва чақнаш овозини эшитиб, турмуш ўртоғи И.Хошимов бўлган хонага югуриб кирган. Турмуш ўртоғинининг ҳолатини кўриб, тез тиббий ёрдам чақирган. Мазкур ўзбошимчалик натижасида, газ ва ҳаво аралашмасининг чақнаши таъсирида фуқаро И.Хошимовнинг қўли ва юзининг 12-15 фоиз қисми енгил куйган.
Шу кунларда “Ҳудудгазтаъминот” акциядорлик жамияти ва унинг республикадаги филиаллари томонидан, аҳоли ўртасида газдан ва айниқса, ис газидан заҳарланиш каби бахтсиз ходисаларни олдини олишга қаратилган тарғибот-ташвиқот ишлари олиб борилмоқда. Афсуски, огоҳлантиришларга қарамай, фуқаролар томонидан ускуналарни ишлатиш йўриқномаси талаблари ва техника хавфсизлиги қоидаларига амал қилинмаслиги ҳамда ўзбошимчалик оқибатида, кўнгилсиз ходисалар келиб чиқмоқда.
“Ҳудудгазтаъминот” АЖ яна бир бор газ истеъмолчиларидан огоҳ бўлишларини, хонадонларидаги мавжуд барча газ ускуналаридан йўриқнома талаблари ва техника хавфсизлиги қоидаларига амал қилган ҳолда фойдаланишларини сўрайди.
Техник носозлик кузатилганда дарҳол газ таъминоти корхоналарига “104”, “1104”, “71 200-08-04” рақамлари орқали мурожаат этишни унутманг!
“Ҳудудгаз Фарғона” МЧЖ матбуот хизмати
828
