Qishni betalafot o‘tkazish maqsadida neft va gaz quduqlarida burg‘ilash va taʼmirlash ishlari samaradorligini oshirish, ishchilarning yashash sharoitlarini yanada yaxshilashga qaratilgan choralar kuchaytirilmoqda.
Xususan, “O‘zbekneftgaz” AJ tasarrufidagi neft va gaz quduqlarining burg‘ilash, mukammal taʼmirlash obyektlarida yo‘nalishlar bo‘yicha ish jarayonlariga amaliy yordam berish, yosh xodimlarni qo‘llab-quvvatlash, ularning mehnat sharoitlarini yaxshilash maqsadida departament boshliqlari va hududlardagi neft bazalari rahbarlaridan iborat “Ishchi guruh” lar gaz konlari va texnologik obyektlarida o‘rganishlar olib bormoqda. “Ishchi guruh” tarkibiga Yoshlar ittifoqining 24 nafar aʼzosi ham kiritilgan.
Yosh kadrlardan iborat “Ishchi guruh” tomonidan joriy yilning 13 dekabr kuni Ustyurt gaz qazib chiqarish boshqarmasining “Quyi Surgil” konidagi 16-, 17-, 24-, 20-sonli quduqlariga, ushbu konga qarashli 1 va 2-sonli gaz yig‘ish punklari hamda “Arslon” gazni kompleks tayorlash qurilmasining holati va ishchilarninr yashash sharoitlari o‘rganildi.
Ayni paytda “Quyi Surgil” konining 16-sonli quduq “O‘zneftgazquduqtaʼmirlash” AJ tomonidan kapital taʼmirlanmoqda. Quduqning chuqurligi 4300 metr bo‘lib, gazni qayta qazib chiqarish maqsadida 3055 metr chuqurlikda torsovka ishlari olib borilmoqda. Taʼmirlash ishlariga jami bo‘lib 16 nafar ishchi-xodim vaxta rejimida ishlashga jalb qilingan. Ularning yashash sharoiti, oziq-ovqatlar bilan o‘z vaqtida taʼminlanish holati, yuvinish va yotoqxonalardagi sharoitlar qoniqarli ekanligi aniqlandi. O‘rganish davomida taʼmir talab bo‘lgan elektr taʼminotining kichik stansiyasini ehtiyot qismlar keltirilib, qisqa muddatda ishga tushirish bo‘yicha ko‘rsatma berildi.
Hozirda mazkur konning 17 va 20-sonli quduqlaridan qazib olinayotgan gaz “Arslan” va “Surgil” gazni kompleks tayorlash qurilmasiga yetkazib berilmoqda. Quduqlarga o‘rnatilgan manometrlarning ishlash holati ko‘zdan kechirildi va maxsus o‘lchov vositasi orqali gaz bosimlari to‘g‘risidagi kunlik maʼlumotlar operatorlik shtabiga shaffof taqdim qilinyotganligi aniqlandi.
Konga qarashli 24-sonli quduqda “Eriell” kompaniyasi tomonidan burg‘ilash ishlari olib borilayotgan bo‘lib, bugungi kunda quduq 4500 metrdan 4110 metrgacha qazilgan. O‘rganishlar burg‘ilash dastgohi uchun zarur bo‘lgan barcha asbob-uskunalar hamda yoqilg‘i mahsulotlari to‘liq mavjud ekanligini ko‘rsatdi.
Shuningdek, “Quyi Surgil” koniga qarashli 1-sonli Gaz yig‘ish punktidagi past bosimli gaz “Sharqiy Berdaq” siquv kompressor stansiyasiga, 2-sonli Gaz yig‘ish punktidagi yuqori bosimli gaz esa “Arslon” gazni kompleks tayorlash qurilmasiga bir maromda yetkazib berilmoqda.
Ishchi guruh tomonidan “Arslon” gazni kompleks tayorlash qurilmasiga ham tashrif amalga oshirildi. Hozirda qurilmada 2 ta texnologik tarmoq mavjud bo‘lib, ushbu tarmoqlarga yuqori bosimli gaz quduqlaridan tabiiy gaz yetkazilmoqda. Ushbu qurilma orqali tozalangan kunlik 3,7 mln kub metr tabiiy gaz “O‘ztransgaz” AJga qarashli magistral quvirga uzatilmoqda.
Shuni taʼkidlash joizki, “Arslon” gazni kompleks tayorlash qurilmasini kengaytirish maqsadida 3-texnologik tarmoqning qurilish ishlari jadallik bilan davom etirilmoqda.
“Ishchi guruh” tomonidan olib borilgan o‘rganishlar natijasi va obyektlarda aniqlangan muammolar hamda ularni bartaraf etish uchun bildirilgan takliflar yuzasidan hisobotlar “O‘zbekneftgaz” AJ Boshqaruvi raisiga zudlik bilan kiritildi.
“O‘zbekneftgaz” AJ Matbuot xizmati
642
