Xabar berganimizdek, Sirdaryo viloyatida Saudiya Arabistonining “ACWA Power” kompaniyasi tomonidan quvvati 1500 MVt bo‘lgan zamonaviy issiqlik elektr stansiyasi barpo etilmoqda.
Unda “Mitsubishi” kompaniyasining dunyodagi eng zamonaviy va eng energiya tejamkor texnologiyalari hamda gaz turbinalari o‘rnatilmoqda.
Xususan, mazkur stansiya uchun Yaponiyadan olib kelinayotgan yirik energoqurilmalar Sirdaryo viloyatida barpo etilayotgan stansiya qurilish maydoniga kirib keldi. Ushbu 525 tonnalik gaz turbinasi kilometrda hisoblaganda ekvatorning 75 foiz masofasiga teng bo‘lgan yo‘lni bosib o‘tib keldi.
Eslatib o‘tamiz, stansiya ishga tushgach, yiliga 12 mlrd kVt-soat elektr energiyasi ishlab chiqaradi. Unda eng zamonaviy, energiya tejamkor texnologiyalar joriy etilishi hisobiga yiliga 1,1 mlrd kub metr tabiiy gaz tejaladi. Stansiya 2023-yil yakuniga qadar ishga tushiriladi.
Ahamiyatlisi, stansiya qurilishi davomida 2000 nafargacha, ishga tushgandan keyin esa 120 nafar yangi ish o‘rni yaratiladi.
O‘zbekiston Respublikasi
Energetika vazirligi Matbuot xizmati
726
