«Ўзбекнефтгаз», «Ўзтрансгаз» ва «Ҳудудгазтаъминот» акциядорлик жамиятлари жорий йилнинг 18-22 ноябрь кунлари Тошкент шаҳрида бўлиб ўтадиган Ўзбекистон саноат ярмаркаси ва кооперация биржасида иштирок этмоқда.
Маҳаллий ишлаб чиқарувчилар шу кунларда экспортга мўлжалланган ўз маҳсулотларини "Ўзэкспомарказ" миллий кўргазма мажмуаси павильонларида намойиш этиш билан бирга, маҳаллийлаштириш жараёнларини чуқурлаштириш ва рақобатбардошликни ошириш борасида ҳамкорлик ўрнатиш имкониятларини ўрганмоқда.
"Ўзбекнефтгаз" АЖ стендида айни пайтда импорт қилинаётган, бироқ маҳаллий ишлаб чиқарувчилар томонидан ўзлаштирилиши мумкин бўлган 50 га яқин турдаги маҳсулотлар намойиш этиляпти.
Шунингдек, бу ерда "Ўзбекнефтгаз" АЖ тизимида ишлаб чиқарилган ва экспортга йўналтирилган маҳсулотлар ҳам тақдим этилган. Ушбу рўйхатдан автомобиль газ баллонлари, полимер ва нефть маҳсулотлари, газ олтингугурти, металл ва композит газ баллонлари, полиэтилен қувурлар ҳамда тайёр пластик маҳсулотлар жой олган.
Кўргазмада "Ўзтрансгаз" АЖ компания тизимига кирувчи корхоналарда ишлаб чиқарилаётган маҳсулотлар бўйича тақдимот ўтказмоқда. Барча хоҳловчилар стендда "Ўзтрансгаз" АЖ имкониятлари ва унинг келажакдаги режалари, шу жумладан, истиқболли лойиҳалар ҳақида маълумот олишлари мумкин. Бу ҳақдаги фильм махсус ўрнатилган мониторда доимий равишда намойиш этилмоқда.
"Ҳудудгазтаъминот" АЖ мутахассислари тадбир давомида ўз маҳсулотларидан фойдаланиш ва уларнинг янги турларига буюртма бериш учун маҳаллий ишлаб чиқарувчилар билан саноат кооперацияси имкониятлари тўғрисидаги масалалар юзасидан мулоқот ўтказяпти.
Қайд этиш керак, мазкур саноат ярмаркасида Ўзбекистоннинг 1000 га яқин ишлаб чиқариш корхоналари ўзларининг 10 мингдан ортиқ турдаги маҳсулотларини намойиш этмоқда.
Тадбирнинг биринчи куни Ўзбекистон Республикаси Иқтисодиёт ва саноат вазирлиги ҳузурида ташкил этилган янги www.cooperation.uz электрон кооперация порталининг тақдимоти бўлиб ўтди. Ушбу платформа туфайли тадбиркорлик субъектлари ўзларига ҳамкорлар топишлари, узоқ муддатли шериклик алоқаларини ўрнатишлари ва саноат маҳсулотларини етказиб бериш бўйича тезкор шартномалар тузишлари мумкин.
Ярмарка ва биржа доирасида тармоқ ва минтақавий корхоналарнинг саноат салоҳияти тақдимотлари, В2В форматидаги учрашувлари ташкил этилиб, бу ишбилармон доиралар вакиллари, йирик саноат корхоналари, кичик бизнес ва хусусий тадбиркорлик вакиллари ўртасида янги шартномалар тузиш имконини беради.
Ўзбекистон Республикаси
Энергетика вазирлиги Матбуот хизмати
«Ўзбекнефтгаз» АЖ ва «Ўзтрансгаз» АЖ
Матбуот хизматлари билан ҳамкорликда тайёрлади
1002
