Bugun, ijtimoiy tarmoqda “Uchtepa tumanidagi tug‘ruqxonada gaz va elektr energiyasi yo‘q” mazmunida xabar e’lon qilindi.
Ushbu xabar yuzasidan quyidagilarni ma’lum qilamiz:
Bugun soat 16:00da Uchtepa tumanidagi 9-tug‘ruqxonani elektr energiyasi bilan ta’minlovchi ikkita tarmoqning birida nosozlik yuzaga kelgan va soat 16:30da qayta tiklangan. Ammo, bitta tarmoq orqali mazkur tug‘ruqxona, xususan tug‘ruq bo‘limi elektr energiyasi bilan uzluksiz ta’minlangan.
Mazkur tug‘ruqxona rahbariyati bilan bog‘lanilganda videodagi holat ushbu tug‘ruqxonada bo‘lmaganini, tug‘ruq bo‘limlarida elektr energiyasida uzilish kuzatilmagani ma’lum qilindi.
Videodagi holatdan ham ko‘rish mumkinki, tug‘ruqxonaning boshqa palatasida elektr energiyasi mavjud.
Shu munosabat bilan videodagi xabar o‘z tasdig‘ini topmadi.
Shu o‘rinda fuqarolardan va ayrim ijtimoiy tarmoq adminlaridan bu kabi tasdiqlanmagan xabarlarni tarqatmasliklarini so‘raymiz.
Ta’kidlash kerakki, kuz-qish mavsumiga tayyorgarlik ko‘rish maqsadida barcha ijtimoiy soha obyektlari, jumladan tibbiyot muassasalalari o‘z hududlarini muqobil yoqilg‘i manbalari (dizel generatorlari, ko‘mir va boshq.) bilan ta’minlash lozimligi belgilangan.
Energetika vazirligi Matbuot xizmati
388
