Respublikamizda sovuq haroratining keskin tushib ketishi natijasida elektr energiya va tabiiy gazga bo‘lgan talab oshgani barchaga ma’lum.
Ushbu talabni qondirish uchun tabiiy gaz va elektr energiyasi importi hajmini tezkor ko‘rilgan choralar va kelishuvlar asosida maksimum darajaga oshirish hisobiga kunlik tabiiy gaz iste’molining 10 foizi hamda elektr energiyasining 8 foizi aynan qo‘shimcha import yordamida ta’minlanib kelmoqda.
Garchi, bugungi kundagi maksimum talabni qondirish uchun gaz quvurlari va magistral elektr tarmoqlarining o‘tkazuvchanlik qobiliyati yetarli bo‘lsa-da, resurslar yetarli emasligi hisobiga iste’molchilarni energiya resurslari bilan ta’minlashda muammolar kuzatilmoqda.
Xususan, anomal sovuq tufayli 12-yanvarda qo‘shni mamlakatning tabiiy gaz qazib chiqarish konlarida yuzaga kelgan avariyaviy holat tabiiy gaz importining to‘liq to‘xtashiga va boz ustiga elektr energiyasi importining 20 foizga qisqarishiga sabab bo‘ldi.
Energiya resurslari taqchilligi kuzatilayotgan paytda ushbu resurslarni birinchi navbatda aholi va ijtimoiy soha obyektlariga yetkazib berish uchun elektr energiyasi eksporti to‘xtatildi.
Bundan tashqari, yirik sanoat korxonalariga energiya resurslarini yetkazib berish hajmi o‘rtacha 70–80 foizga qisqartirildi.
Shu ko‘rilgan choralarga qaramasdan respublikaning elektr energiyasi iste’moli eng baland ko‘rsatkichga, ya’ni 250 mln kVt.soatga chiqdi. Shuningdek, tabiiy gazga bo‘lgan kunlik talab qazib chiqarishga nisbatan yuqoriligicha saqlanib qolmoqda.
Ma’lumot uchun: 2022-yil 31-dekabr kuni cheklov kiritilmagan va kunlik elektr energiyasi iste’moli 220 mln kVt.soatni tashkil etgan.
Birgina Toshkent shahrida 13-yanvar kuni elektr energiyasi iste’moli 32 mln kVt.soatdan ortib, turli sabablarga (avariyaviy holatlar va cheklovlar) ko‘ra 1 mln kVt.soat elektr energiyasi iste’molchilarga yetkazib berilmadi.
Tabiiy gazni aholiga yo‘naltirish uchun issiqlik elektr stansiyalarida tabiiy gaz yoqish hajmi kamaytirilib, zaxiradagi mazut yoqilg‘isi rejaga nisbatan 3 barobarga ko‘p yoqilmoqda.
O‘tgan kuz-qish mavsumiga nisbatan joriy kuz-qish mavsumida Chorvoq suv omborida suv sathining yuqoriligi sababli gidroelektr stansiyalar tomonidan rejaga nisbatan 170 foiz elektr energiyasi ishlab chiqarilmoqda.
Tabiiy gaz tanqisligi kuzatilayotgan shu kunlarda iste’molchilar xonadonlarni isitish uchun elektr qurilmalaridan keng foydalanmoqdalar. Natijada, birgina Toshkent shahrida bugungi kun davomida tarmoqlarda yuklamalarning ortishi hisobiga 1000 dan ortiq nosozliklar yuzaga keldi.
Nosozliklarni bartaraf etish ishlarni jadallashtirish maqsadida respublika bo‘ylab barcha hududiy elektr tarmoqlari korxonalaridan qo‘shimcha brigadalar Toshkentga jalb qilindi.
Hurmatli vatandoshlar, albatta biz ushbu vaziyatni o‘nglash, nosozliklarni bartaraf etish uchun barcha zaruriy choralarni ko‘rmoqdamiz.
Mana shunday og‘ir paytda barchamiz birlashib harakat qilsak bu muammolarni yengamiz. Bunda energiya resurslaridan oqilona va imkon qadar tejamkorlik bilan foydalanish eng muhim omil hisoblanadi. Buning uchun imkon qadar:
- xonadonlarda bittadan ortiq elektrda ishlaydigan isitish qurilmalaridan foydalanmaslik;
- korxonalar va tashkilotlar xodimlarini vaqtincha onlayn ish rejimiga o‘tkazish;
- ortiqcha ko‘cha chiroqlarini, reklama ekranlari va illyuminatsiyalar, shu jumladan qurilishi tugallanmagan binolardagi chiroqlarni o‘chirish;
- energiya resurslaridan noqonuniy foydalanayotgan iste’molchilarga chora ko‘rish lozim.
Buning natijasida mazkur tejalgan energiya resurslarini aholi va ijtimoiy soha ob’ektlariga yo‘naltirishga erishiladi.
Hurmatli iste’molchilar, energiya resurslaridan noqonuniy foydalanish holatlariga guvoh bo‘lsangiz, 1154, 1104, 105 telefon raqamlari orqali murojaat qilishingizni so‘raymiz.
Misol uchun, o‘tkazilgan o‘rganishlar natijasida iste’molchilar tomonidan joriy kuz-qish davrida tabiiy gazdan 334 mlrd so‘mlik
3 mingta, elektr energiyasidan 135 mlrd so‘mlik 2 ming 300 ta holatda noqonuniy foydalanish holatlari aniqlangan.
Hurmatli vatandoshlar, barchamiz birlashib, energiya resurslaridan samarali va oqilona foydalansak, albatta ushbu muammolarni yengishga erishamiz.
2117
