Xabar berganimizdek, Sirdaryo viloyatining Shirin shahri va Boyovut tumanlari hududida Saudiya Arabistonining “ACWA Power” kompaniyasi tomonidan quvvati 1500 MVt bo‘lgan zamonaviy issiqlik elektr stansiyasi qurilmoqda.
Unda “Mitsubishi” kompaniyasining dunyodagi eng zamonaviy va eng energiya tejamkor texnologiyalari hamda gaz turbinalari o‘rnatilmoqda.
Mazkur stansiya uchun Yaponiyadan olib kelinayotgan yirik energoqurilmalarning ikkinchi bosqichi yurtimizga kirib keldi. Ushbu qurilmalar ayni kunda Qoraqalpog‘iston Respublikasidan Sirdaryo viloyatiga olib kelinmoqda.
Stansiya yiliga 12 mlrd kVt-soat elektr energiyasi ishlab chiqaradi. Unda eng zamonaviy, energiya tejamkor texnologiyalar o‘rnatilishi hisobiga yiliga 1,1 mlrd kub metr tabiiy gaz tejaladi. Stansiya joriy 2023-yil yakuniga qadar ishga tushiriladi.
Stansiya qurilishi davomida 2000 nafargacha, ishga tushgandan keyin esa 120 nafar yangi ish o‘rni yaratiladi.
Eslatib o‘tamiz, 2022-yil dekabr oyida mazkur IESda Yaponiyadan olib kelingan birinchi gaz turbinasi o‘rnatilgan edi.
Energetika vazirligi Matbuot xizmati
698
