“Issiqlik elektr stansiyalari” AJ mamlakatimizda elektr va issiqlik energiyasi ishlab chiqaruvchi asosiy generatsiya tizimi hisoblanadi. Yurtimizda jami ishlab chiqarilayotgan elektr energiyasining 80 foizi korxona zimmasiga to‘g‘ri keladi.
Ayni kunlarda korxona o‘zining 2022-yildagi faoliyati yuzasidan dastlabki ma’lumotlarni e’lon qildi.
2022-yilda ishlab chiqarilgan elektr va issiqlik energiyasi hajmi 17,9 trln. so‘mni tashkil etib, reja ko‘rsatkichi 103,8 foizni tashkil qildi. Bunda, o‘tgan yil natijalariga ko‘ra 55,5 mlrd. kVt.soat elektr energiyasi va 5,35 mln. Gkall issiqlik energiyasi ishlab chaqarilib yagona energotizimga uzatildi.
Tarmoqni moliyaviy sog‘lomlashtirish, operatsion samaradorlikni oshirish, boshqaruv tizimini jahonda tan olingan tamoyillar asosida tashkil etish maqsadida “McKinsey&Company”, KPMG va Deloitte kabi xalqaro konsalting kompaniyalari jalb qilindi hamda o‘rganishlar natijasida bir qator tashabbuslar va rivojlanish strategiyasi ishlab chiqildi.
Shunga ko‘ra, iste’molchilarga barqaror energiya resurslarini yetkazib berish, elektr va issiqlik energiyasi narxining oshishiga yo‘l qo‘ymaslik maqsadida, yoqilg‘i sarfini kamaytirish, operatsion samaradorlikni ta’minlash, yuqori rivojlangan hamda energosamarador texnologiyalarni joriy etish natijasida 2022-yilda ishlab chiqarilgan mahsulot tannarxi 1,36 trln. so‘mga pasaytirildi. Bunda belgilangan reja 118,3 foizga bajarildi.
Investitsiya dasturiga asosan 6 ta loyiha doirasida 256,3 mln. AQSH dollari o‘zlashtirilib, belgilangan yillik reja 111,9 foizni tashkil etdi.
Investitsiya loyihalari doirasida hozirgi vaqtda Toshkent IEMda har birining quvvati 32 MVtga teng bo‘lgan ikkita gaz turbina qurilmasini qurish va Tolimarjon IESning quvvatini kamida 900 MVtga oshirish bo‘yicha istiqbolli loyihalar amalga oshirilmoqda.
“Issiqlik elektr stansiyalari” AJ investitsiya loyihalarini samarali amalga oshirish bo‘yicha, bugungi kunda AQSHning “General Electric”, Yaponiyaning “Mitsubishi Corporation”, “Itochu”, Janubiy Koreyaning “Hyundai”, Ispaniyaning “Intecsa Ingeniera Industrial S.A.”, Italiyaning “AC Boilers S.p.A”, Rossiyaning «Силовые машины», «Красный котельщик», «Калужский турбинный завод», «Таганрогский котелостроительный завод», «Ленинградский металлический завод», Turkiyaning “Çalik Enerji” kompaniyalari hamda YTTB, OTB, Yaponiyaning “JICA”, Xitoyning davlat taraqqiyot banki bilan samarali hamkorlik ishlari olib borilmoqda.
Shuningdek, 2022-yilda Jahonda “Katta uchlik” guruhiga kiruvchi AQSHning “Fitch Ratings” reyting agentligi “Issiqlik elektr stansiyalari” AJning xalqaro indikativ reytingini “BB-” “Barqaror” darajada baholadi va O‘zbekiston Respublikasining suveren reytingiga tenglashtirdi. Mazkur reyting, “Issiqlik elektr stansiyalari” AJni jahonning investitsiya bozorlarida aniq va ravshan biznes strategiyasiga, shaffof moliyaviy holatiga va kuchli korporativ boshqaruv tizimiga ega korxona sifatida tanitadi.
Aksiyadorlik jamiyati tomonidan kadrlar siyosatiga ham alohida e’tibor qaratilmoqda. xodimlarni qayta o‘qitish, xorijda malakasini oshirish bo‘yicha 2022-yil uchun “Yo‘l xaritasi”ga asosan Germaniya, Italiya, Rossiya va Yaponiya kabi davlatlarda 100 dan ortiq, Navoiy IES qoshidagi kelajak energetikasi ta’lim muassasasida esa 200 ga yaqin xodim malakasi oshirildi. Sоhаga malakali kadrlarni jalb etish maqsadida 123 ta yangi bo‘sh ish o‘rinlari yaratilib, ularga sohaviy o‘rta-maxsus va oliy ta’lim muassasalarining yosh bitiruvchi-mutaxassislari jalb etildi.
Ta’mirlash ishlarida zarur bo‘ladigan uskunalar, detallar va jihozlarni ishlab chiqish, valyutaning chetga chiqib ketishining oldini olish maqsadida sano’at kooperatsiyasi va mahalliylashtirish asosida ishlab chiqarish yanada kengaytirildi. Natijada 2022-yilda 26,1 mlrd.so‘mlik mahsulotlar ishlab chiqarilib, reja ko‘rsatkichi 119,0 foizga bajarilishiga erishildi. Shu tariqa import hajmi 16,2 mln.dollarga qisqardi.
Ma’lumot o‘rnida, “Issiqlik elektr stansiyalari” AJ mamlakatimizda yirik soliq to‘lovchi korxonalardan biri hisoblanadi. Jamiyat va uning tasarrufidagi filiallar tomonidan 2022-yilning dastlabki ma’lumotlariga ko‘ra 2,7 trln. so‘mga yaqin soliq to‘lovlari davlat byudjetiga yo‘naltirildi.
Shuningdek, ta’kidlash lozim “Issiqlik elektr stansiyalari” AJ va uning filiallari yirik ish beruvchi tarmoq hisoblanadi, bugun tizim korxonalarida qariyb 12 mingga yaqin ishchi-xizmatchilar mehnat qilishmoqda. Ularning 2 ming 65 nafarini xotin-qizlar, 2 ming 175 nafarini yoshlar tashkil etadi.
“Issiqlik elektr stansiyalari” AJ Matbuot xizmati
3451
