Гол, гол, гол. Яна битта гол...
Тошкентдаги 21-Меҳрибонлик уйи тарбияланувчилари ўз футбол жамоаларини кўтаринки кайфият ва жўровозликда шундай сўзлар билан қўллаб-қувватлаб туришди. Қўллаб-қувватлашга арзийдиган сабаб бўлдида, чунки ўртоқлик учрашуви “Бунёдкор” клубининг ёшлар жамоаси билан эди...
Бугунги кунда 135 нафар ўғил-қиз тарбияланаётган муассасада замонавий футбол ўйингоҳи бор. Алоҳида футбол жамоаси ҳам ташкил қилинган. Улар учун ўз вақтида машғулотлар ўтказилмоқда. “Ўзтрансгаз” Акциядорлик жамияти вакиллари эса муассаса тарбияланувчиларини кўргани бориб, футбол жамоаси учун спорт кийим жамланмалари ва спорт анжомларини совға қилишди.
Болалар билан учрашув байрамга айланиб кетди. Чунки бу тадбирда, Футбол бўйича Ўзбекистон Миллий термаси ва ”Бунёдкор” жамоасининг В.Абрамов бошчилигидаги мураббийлари, “Бунёдкор” спорт мажмуаси раҳбарияти ва футболчиларидан иборат делегация ҳам иштирок этдилар. Ўзбекистон терма жамоаси мураббийи В.Абрамов ва бошқа сўзга чиққанлар муассаса тарбияланувчиларига яхши тилаклар билдиришди. Юртимизда ҳар бир бола эътиборда эканлиги таъкидланди.
”Бунёдкор” футбол академиясининг А. Иброҳимов мураббийлик қилаётган 10 ёшли болалардан иборат жамоаси 21-Меҳрибонлик уйи футболчилари билан ўртоқлик учрашувини ўтказишди. Мезбон спортчилар ғолиб бўлишди. Бу эса ушбу муассасада келгусида кучли футболчилар етишиб чиқишига умид беради.
Ўзбекистонда хизмат кўрсатган артист И. Фармоновнинг шўх қўшиқлари ва севимли мультфильм қаҳрамонларининг чиқишлари тадбир иштирокчиларнинг кўнгилларини завққа тўлдирди. Болажонларга хурсандчилик кайфияти улашилди.
“Ўзтрансгаз” АЖ Матбуот хизмати
820
