O‘zbekiston Respublikasi Prezidentining Qirg‘iz Respublikasiga davlat tashrifi chog‘ida erishilgan kelishuvlarni amalga oshirish maqsadida qo‘shma amaliy harakatlar rejasi tasdiqlangan edi. “Shimoliy So‘x” gazni yer ostida saqlash inshootida (GYOSI) tabiiy gazni saqlash tizimini tiklash” loyihasi ham ana shu rejadan o‘rin olgan.
O‘zbekiston va Qirg‘iz Respublikalarining Energetika vazirlari tomonidan “Shimoliy So‘x” GYOSIda tabiiy gazni saqlash tizimini tiklash” loyihasining texnik-iqtisodiy asosini tayyorlash uchun “Yo‘l xaritasi” imzolangani bu boradagi ishlarni jadallashtirib yubordi. Shunga ko‘ra, O‘zbekiston Respublikasi tomonidan 15 kishidan iborat Ishchi guruh shakllantirildi. “O‘zLITIneftgaz” AJ bilan birgalikda “Shimoliy So‘x” GYOSI quduqlarida dala tadqiqotlarini o‘tkazish uchun Texnik topshiriq ishlab chiqildi.
Joriy yilning 10-aprel kuni Energetika vazirligi boshchiligidagi Ishchi guruh mavjud muammolarni o‘rganish maqsadida Qirg‘iz Respublikasining Qadamjay tumaniga tashrif buyurdi.
Qirg‘iz Respublikasi tomonidan tuzilgan ishchi guruh bilan o‘tkazilgan uchrashuvda yo‘l xaritasida ko‘zda tutilgan tadbirlarni amalga oshirish muhokama qilinib, hududdagi gaz quduqlarining holati ko‘zdan kechirildi. Loyiha doirasida amalga oshiriladigan navbatdagi ishlar belgilab olindi.
390
