Markaz Energetika vazirligi va “Issiqlik elektr stansiyalari” AJ tomonidan bunyod etildi. “O‘zbekiston yoshlar forumi” doirasida uning tantanali ochilish marosimi bo‘lib o‘tdi.
Unda Energetika vazirligi va “Issiqlik elektr stansiyalari” AJ mas’ullari, Sirdaryo viloyati hokimligi hamda O‘zbekiston energetika, neft-gaz va geologiya xodimlari kasaba uyushmasi respublika kengashi vakillari ishtirok etdi.
— Energetiklar shahri bo‘lgan Shirinda bunday markazning siz yoshlarga topshirayotganimiz bizni ham xursand qilyapti. Ishonchim komil, u doimo shijoatli va kelajakka ishonch bilan boqadigan yoshlarga to‘la bo‘ladi. Orzularingiz amalga oshishida hissamiz qo‘shilganidan xursandmiz, — deydi “Issiqlik elektr stansiyalari” AJ boshqaruvi raisi v.b. Bahodir Jurayev.
“Yoshlar markazi”. Zamonaviy arxitektura yechimi asosida bunyod etilgan, har tomonlama qulaylikga ega, shinam, eng asosiysi Shirin shahri yoshlari orzusidagi haqiqiy yoshlar maskanidir. Undan “Coworking”, “IT-park”, “Axborot resurs markazi”, “Madaniyat uyi”, “Book cafe” va Yoshlar agentligi binosi o‘rin olgan.
Bu esa, yoshlarning g‘oya va tashabbuslarini qo‘llab-quvvatlash, iste’dodlarini namoyon etishlari, bilim olishlari, erkin muloqot orqali o‘zaro tajriba almashishlari, o‘ylantirayotgan u yoki bu masalalar bo‘yicha muhokamalar o‘tkazishlari uchun yaxshi imkoniyat degani.
— Yashirmayman, shaharchamizda ana shunday “Yoshlar markazi” bo‘lishini ko‘pdan beri niyat qilar edik. Uning qurilishi boshlanganida, binoga qarab o‘zimizcha orzular qilganimiz ham rost. Markazda ish boshlaydigan har bir yo‘nalish biz uchun bir imkoniyat. Undan unumli foydalanishga va bilimimizni yanada oshirishga harakat qilamiz, — deydi Shirin shahridagi 4-sonli umumta’lim maktabining 9-sinf o‘quvchisi Xolida Alijonova.
867
