Mazkur forum doirasida zamonaviy arxitektura yechimlari asosida bunyod etilgan “Yoshlar markazi” foydalanishga topshirildi. Shuningdek, qator media va madaniy-ma’rifiy tadbirlar tashkil etildi (foto).
Yoshlar markazi Energetika vazirligi va “Issiqlik elektr stansiyalari” AJ tomonidan bunyod etildi. Shirin shahrida bo‘lib o‘tgan “O‘zbekiston yoshlari forumi” doirasida uning tantanali ochilish marosimi bo‘lib o‘tdi.
“Yoshlar markazi” – Zamonaviy arxitektura yechimi asosida bunyod etilgan, har tomonlama qulaylikka ega, shinam, eng asosiysi Shirin shahri yoshlari orzusidagi markaz. Undan “Coworking”, “IT-park”, “Axborot resurs markazi”, “Madaniyat uyi”, “Book cafe” va Yoshlar agentligi binosi o‘rin olgan. Bu esa yoshlarning g‘oya va tashabbuslarini qo‘llab-quvvatlash, iste’dodlarini namoyon etishlari, bilim olishlari, erkin muloqot orqali o‘zaro tajriba almashishlari, o‘ylantirayotgan u yoki bu masala bo‘yicha muhokamalar o‘tkazishlari uchun yaxshi imkoniyat degani.
Tantanali ochilish marosimi “Rahbar va yoshlar” uchrashuviga ulanib ketdi. Unda Energetika vazirligi va “Issiqlik elektr stansiyalari” AJ, Sirdaryo viloyati hamda Shirin shahri hokimligi mutasaddilari qatnashdilar.
Uchrashuvda energetika tizimida faoliyat olib borayotgan xodimlarning kattagina qismini yoshlar tashkil etishi, ular o‘z bilim va salohiyatlari bilan sohada ulkan marralarni zabt etish uchun munosib baza ekanligi ta’kidlandi.
Shundan so‘ng, ishtirokchilar ham sohada faoliyat yuritayotgan yoshlarni rag‘batlantirish, ularning ilmiy salohiyatini oshirish va turli musobaqalar tashkil etish orqali sog‘lom raqobatni rivojlantirish borasidagi takliflarni bildirib o‘tdilar.
Mazkur takliflar ijrosini ta’minlash bo‘yicha shu joyning o‘zida tegishli topshiriqlar berildi.
Tadbir yakunida yoshlar va rahbarlar ishtirokida “Yashil makon” umummilliy loyihasi doirasida “Yoshlar markazi” hududiga 200 tupdan ortiq mevali va manzaralari daraxt ko‘chatlari o‘tqazildi.
Forum doirasida “Sportni sev, sport bilan yasha!” shiori ostida “Energetiklar marafoni” tashkil etildi. Unda “Issiqlik elektr stansiyalari” AJ va filiallari, energetika, neft-gaz va geologiya korxonalari yoshlari 4,5 km masofani bosib o‘tdilar.
Shuningdek, OAV vakillari, jurnalist va blogerlar hamda yoshlar uchun bir nechta manzillarga press-tur tashkil etildi.
Jumladan, tadbir qatnashchilari va ishtirokchilari Sirdaryo issiqlik elektr stansiyasi faoliyati bilan yaqindan tanishdilar.
Darvoqe, Sirdaryo IESning birinchi energobloki ishga tushganiga o‘tgan 2022-yilda 50 yil to‘ldi. Mazkur korxona nafaqat mamlakatimiz balki butun Markaziy Osiyodagi eng yirik elektr stansiya hisoblanadi. Korxonada jami 10 ta energoblok mavjud bo‘lib, hozirgi kunda bu yerda sutkasiga o‘rtacha 42 mln kVt·soat elektr energiyasi ishlab chiqarilmoqda.
Shuningdek, stansiyada o‘z ehtiyoji uchun sarflanadigan elektr energiyasini iqtisod qilish maqsadida muqobil energiya manbalaridan samarali foydalanish yo‘lga qo‘yilgan. Hozirda elektr stansiyada jami sig‘imi 2400 litrga teng bo‘lgan 12 ta quyosh suv isitish qurilmalari ishlamoqda. Joriy yilning fevral oyida esa quvvati 1,3 MVt bo‘lgan quyosh fotoelektr stansiyasi ishga tushirildi.
Keyingi manzil Sirdaryo IESga yondosh hududda, Shirin shahri va Boyovut tumanlari hududida Saudiya Arabistonining “ACWA Power” kompaniyasi tomonidan qurilayotgan quvvati 1 500 MVt bo‘lgan “ACWA Power Sirdaryo” IES bo‘ldi. Uchrashuv korxona bosh direktori va muhandislari ishtirokida o‘tdi. Unda yoshlar va OAV vakillari qatnashdilar.
Taqdimot davomida elektr stansiyaning qurilish jarayoni, uning texnik imkoniyatlari haqida batafsil to‘xtalib o‘tildi.
Ma’lumot o‘rnida, stansiya Prezidentimizning 2020-yil 10-avgustdagi “Sirdaryo viloyatida quvvati 1 500 MVt bo‘lgan yangi issiqlik elektr stansiyasi qurilishini tashkil etish chora-tadbirlari to‘g‘risida”gi qarori asosida qurilmoqda. Korxonada yiliga o‘rtacha 12 mlrd kVt·soat elektr energiyasi ishlab chiqariladi.
Energetika sohasiga zamonaviy texnologiyalarning joriy etilishi malakali kadrlarni tayyorlashda qo‘l keladi. Energetika vazirligi va “Issiqlik elektr stansiyalari” AJ tasarrufidagi Shirin energetika kolleji kasb-hunarga o‘rgatish, soha va tarmoqlarni yetuk, salohiyatli mutaxassis kadrlar bilan ta’minlashda yetakchilik qilib kelmoqda. Tadbir qatnashchilari o‘quv maskanida bo‘lib, bu yerda yaratilgan shart-sharoitlar, o‘quv amaliyoti bilan yaqindan tanishdilar.
Kollej 660 o‘ringa mo‘ljallangan. Bu yerda Saudiya Arabistonining “ACWA Power” kompaniyasi buyurtmasi asosida kadrlar tayyorlash yo‘lga qo‘yilgan. Jami 2,8 mln dollarlik 19 ta zamonaviy ustaxona, 4 ta laboratoriya va yotoqxona barpo qilingan. Ta’lim sifatini oshirish, axborot kommunikatsiya texnologiyalarini keng joriy etish maqsadida muassasa hududi to‘liq WiFi bilan ta’minlangan.
Hozirda kollejda Issiqlik elektr stansiyalari turbina qurilmalarini ishlatish, Elektr stansiyalari uskunalarini ta’mirlash bo‘yicha chilangar, Elektr uskunalarini ta’mirlash va ularga xizmat ko‘rsatish bo‘yicha elektromontyor hamda Axborot vositalari mashinalari va kompyuter tarmoqlari operatori kabi o‘ndan ortiq yo‘nalishlar bo‘yicha yoshlarga ta’lim berilmoqda.
O‘z atrofiga ertangi kunga ishonch bilan qaraydigan, maqsadi aniq, shijoatli yoshlarni birlashtirgan “O‘zbekiston yoshlari forumi” o‘zbek estradasining yosh ijodkorlari ishtirokidagi gala konserti bilan yakunlandi. Umuminsoniy qadriyatlar, ona vatanga muhabbat g‘oyalari asosida ijro etilgan kuy-qo‘shiqlarga hamoxang tarzda otilgan mushaklar ishtirokchilarga o‘zgacha kayfiyat ulashdi.
Energetika vazirligi va “Issiqlik elektr stansiyalari” AJ Matbuot xizmati
1382
