Saudiya Arabistonining “ACWA Power” kompaniyasi raisi Muhammad Abunayyan “O‘zbekiston 24” telekanaliga so‘nggi yillarda O‘zbekistonda energetika sohasida amalga oshirilayotgan ishlar haqida intervyu berdi.
Boshlovchi: Poytaxtimiz 27-28-aprel kunlari ikkinchi Toshkent xalqaro investitsiya forumiga mezbonlik qiladi. Bu keng ko‘lamli muloqot maydoni bo‘lib, forum O‘zbekistonning sarmoyaviy salohiyatini xalqaro investorlar va ishbilarmon doiralarga taqdim etish barobarida, investorlar o‘rtasida hamkorlik aloqalarini kengaytirish uchun zo‘r imkoniyat.
O‘tgan yili xalqaro investitsiya forumida 56 ta davlatdan 2 mingga yaqin yirik investorlar va yuqori martabali mehmonlar ishtirok etgan. Biz mazkur anjumanda ishtirok etish istagini bildirgan, energetika sektorida o‘z nufuziga ega “ACWA Power” kompaniyasi raisi janob Muhammad Abunayyan bilan suhbatlashamiz.
Intervyuga vaqt ajratganingiz uchun tashakkur. Siz bilan suhbatlashayotganimdan mamnunman. Siz o‘tgan yili Toshkent xalqaro investitsiya forumida yuqori martabali mehmon sifatida ishtirok etdingiz. Bir necha kun avval, bu yilgi anjumanda ham ishtirok etishingiz ma’lum bo‘ldi. Bu – qaysidir ma’noda mamlakatimizga bildirgan katta qiziqishingizdan dalolat. Savolim shundan iboratki, nega aynan O‘zbekiston? O‘lka sizni nimasi bilan jalb qilmoqda?
Muhammad Abunayyan: “Avvalo, intervyuga taklif qilganingiz uchun rahmat. O‘zbekiston juda ajoyib yetakchisiga ega. Prezident 6 yildan beri o‘lkada transformatsiya jarayonini amalga oshirib kelmoqda. Uning sa’i-harakatlari o‘laroq, mamlakat hozirgi investitsion jozibadorligiga erishdi. Shuningdek, O‘zbekiston va Saudiya Arabistoni rahbarlarining aloqalari mustahkam. O‘zbekiston qayta tiklanuvchi energiya manbalarini joriy qilishda ham faol. Strategiya, qonunchilik, qulay muhit, investitsion jozibadorlik – sizlarda barchasi mujassam.
O‘z tajribamdan kelib chiqqan holda aytadigan bo‘lsam, o‘tgan 3 yil ichida AcwaPower kompaniyasi O‘zbekiston hukumati va tegishli vazirliklar bilan samarali hamkorlikni yo‘lga qo‘ydi. Natijada yashil loyihalarni amalga oshirish uchun zarur texnologiyalar olib kelindi.
Ta’kidlash joizki, O‘zbekiston mazkur sohaga xorijiy investitsiyalarni jalb qilish barobarida, yashil energiya loyihalari bo‘yicha Markaziy Osiyo mintaqasida yetakchiga aylanib bormoqda”.
Boshlovchi: Bu yilgi Toshkent xalqaro investitsiya forumidan qanday natijalarni kutyapsiz? Umuman, O‘zbekiston bilan hamkorlik istiqbollarini rivojlantirish bo‘yicha fikrlaringiz bilan o‘rtoqlashsangiz.
Muhammad Abunayyan: “Prezidentning qo‘llab-quvvatlovi bilan, eng zo‘r tajribalarni joriy qilish barobarida, investorlarni o‘ylantirayotgan masalalarni ochiq muhokama qilish imkoni mavjud.
Muloqot maydonidan umidimiz katta. O‘ylaymanki, bu - xorijiy sarmoyadorlarning ehtiyojlari va O‘zbekistonning mavjud investitsion salohiyatini o‘rtaga tashlash uchun muhim platforma bo‘ladi. Biz mazkur 2 ta jihatni birlashtirib, imkoniyatlarni yanada oshirishga, kutilayotgan natijalardan ko‘prog‘iga erishishga harakat qilamiz. Umid qilamanki, sa’i-harakatlar mamlakatning iqtisodiy ko‘rsatkichlariga ham ijobiy ta’sir o‘tkazadi.
Bizga davlat rahbarining intilishlari, maqsadlari ma’lum. Ushbu natijalarga erishish uchun boy tajriba va texnologiyalarni jalb qilishga tayyormiz. So‘ng, O‘zbekiston orqali boshqa Markaziy Osiyo davlatlariga investitsiya kiritish imkoniyati ham kengayadi. O‘ylaymanki, investitsiya forumi yordamida dolzarb masalalarni muhokama qilish bilan birga, mamlakatining investitsion imkoniyatlarini yanada oshirishga erishamiz”.
Boshlovchi: Janob Abunayyan javobingiz uchun rahmat. Sizni investitsiya forumida shaxsan ko‘rishni kutib qolaman.
Muhammad Abunayyan: “Rahmat. Xalqaro investitsiya forumi muvaffaqiyatli kechadi degan umiddaman. Yana bir bor intervyuga taklif qilganingiz uchun tashakkur. Investitsiya forumida ko‘rishguncha”.
610
