Joriy yilning 18-may kuni “Tashkent Law Spring” xalqaro yuridik forumi hamda “O‘zbekiston neft va gazi — OGU 2023” 25-yubiley Xalqaro ko‘rgazmasi doirasida Energetika vazirligi Yuridik bo‘limi mas’ul xodimlari hamda “Curtis Mallet-Prevost Colt va Mosle LLP” Xalqaro yuridik firmasi vakillari bilan uchrashuv o‘tkazildi.
Ma’lumot uchun: Curtis, Mallet-Prevost, Colt & Mosle LLP 1830-yilda tashkil topgan Nyu-York shahridagi mashhur xalqaro yuridik firma bo‘lib, uning dunyoning 19 ta shahrida (jumladan, Qozog‘istonda) ofislari mavjud hamda 250 dan ortiq o‘z sohasining yetuk huquqshunoslari mehnat qiladi. Yuridik firma davlat boshqaruv organlari manfaatlarini himoya qilishga ixtisoslashgan bo‘lib, yoqilg‘i-energetika kompleksida arbitraj ishlarini muvafaqqiyatli hal qila olgani bilan Amerika mintaqasida keng shuhrat qozongan.
Uchrashuvda Energetika vazirligi Yuridik bo‘limi boshlig‘i Farruhjon Fayziyev O‘zbekiston Respublikasi qonunchiligidagi o‘zgarishlar, sohada amalga oshirilayotgan huquqiy islohotlar haqida ma’lumot berdi. O‘zbekiston tomonidan investorlar uchun qonunchilik orqali yaratilgan afzalliklar xususida alohida tushuntirishlar berildi.
Uchrashuv davomida tomonlar uchun manfaatli sohalar bo‘yicha hamkorlik masalalari muhokama qilindi. Jumladan, sohaga oid model qonunlarni ishlab chiqish, arbitraj ishlarini hal etishdagi professional ishtirok bo‘yicha takliflar bildirildi.
Energetika vazirligi Matbuot xizmati
580
