Energetika vazirligi huzuridagi “O‘zenergoinspeksiya” tomonidan respublika iste’molchilariga yetkazib berilgan elektr energiyasi sifatini talab darajasiga keltirish maqsadida tashkiliy ishlar amalga oshirilmoqda.
Ko‘rilayotgan choralar doirasida amaldagi qoidalarga, tuzilgan shartnoma shartlariga rioya qilmagan holda energetika tizimiga salbiy ta’sir ko‘rsatib, elektr energiyasidan foydalanib kelish holatlari aniqlandi.
Ushbu holatlarni bartaraf etish va tarmoqdagi asosiy yo‘qotishlarni kamaytirish maqsadida elektr energiyasidan nooqilona foydalangan, shu bilan birga to‘lovlarni vaqtida amalga oshirmagan iste’molchilarga elektr energiyasi yetkazib berishni to‘xtatish choralari ko‘rilmoqda.
Jumladan, elektr energiyasidan foydalanish qoidalariga rioya qilmasdan faoliyat yuritib kelayotgan Qashqadaryo viloyatidagi “Agrotexservis” MChJ, Namangan viloyatidagi “Aziya Karer Bizness” MChJ, Sirdaryo viloyatidagi “Beton sanoat” MChJning elektr qurilmalari tarmoqdan ajratildi.
Bu kabi tizimga salbiy ta’sir ko‘rsatish holatlarining eng ko‘pi hozirgacha Buxoro viloyatida aniqlangan - 33 ta. Shuningdek, Sirdaryo viloyatida ham 21 ta, Toshkent viloyatida esa 20 ta ana shunday qoidabuzarlik aniqlangan.
Bunday insofsiz iste’molchilarga nisbatan qat’iy choralar ko‘rildi.
Nazorat tadbirlari davom etmoqda.
534
