Nima uchun Toshkent shahrining ko‘plab tumanlarida yo‘l qurilish ishlari olib borilmoqda? So‘nggi haftalarda Toshkent shahri tumanlarida ham yo‘l qurilish ishlari jadal olib borilayotganini ko‘rish mumkin. Bu elektr energiyasi ta’minoti barqarorligini oshirish maqsadida qilinmoqda, dedi hokimlik vakili.
Joriy yilda poytaxtimizda 903 kilometrli past kuchlanishli elektr kabellari almashtirilib, 228 ta transformator punkti yangilanadi. Bu kabi yirik masshtabdagi ish ilk marotaba amalga oshirilmoqda.
So‘nggi haftalarda Toshkentning ko‘plab tumanlarida yo‘l qurilish ishlari faol olib borilyapti. Xususan, ko‘chalar bo‘ylab kavlangan xandaqlarga yotqizilgan kabellar ko‘rinib turadigan beton lotoklar o‘rnatild.
Toshkent shahar hokimi o‘rinbosari, poytaxt Uy-joy kommunal xizmat ko‘rsatish bosh boshqarmasi boshlig‘i Shohruh Rahimjonovning “Gazeta.uz”ga ma’lum qilishicha, bu boradagi ishlar O‘zbekiston Prezidentining 11 mart kuni imzolangan “Toshkent shahridagi iste’molchilarni energiya resurslari bilan barqaror ta’minlash choratadbirlari to‘g‘risida"gi qaroriga muvofiq amalga oshirilmoqda.
– Hozirgi paytda umumiy uzunligi 320 kilometr bo‘lgan uchastkalarda ishlar olib borilmoqda. Bu yerda 35-110 kV kuchlanishli kabel tarmoqlari yotqizilmoqda, – deydi Shohruh Rahimjonov. – Shuningdek, 5 ta yangi podstansiya qurilib, 4 ta podstansiya rekonstruksiya qilinmoqda.
“Qishda kuzatilgan holat takrorlanmasligi, yozda ommaviy uzilishlar bo‘lmasligi uchun ham katta ishlar bajarilyapti. Bunday keng ko‘lamli ishlar ilgari amalga oshirilmagan”, deydi suhbatdoshimiz.
Loyiha doirasida joriy yilda 903 kilometrli past kuchlanishli elektr uzatish tarmoqlari va 228 ta transformator punktini yangilash ko‘zda tutilgan. Umuman olganda, 2025 yilgacha bo‘lgan dastur doirasida 2969 kilometr past kuchlanishli tarmoqlar va 703 ta transformator punktini yangilash rejalashtirilgan.
Manba: Gazeta.uz
440
