Ijtimoiy tarmoqlarda tarqalayotgan Qoraqalpog‘istonning Xo‘jayli tumanidan o‘tuvchi gaz quvurida sodir bo‘lgan yong‘in haqida ma’lumot:
2023-yil 4-iyun kuni soat 19:15 da Buxoro – Ural magistral gaz quvurining 464 kilometridan ulangan, 1982-yilda foydalanishga topshirilgan “Nukus-2” GTSga boruvchi 530 mm diametrli tarmoq gaz quvurining 2,3 kilometrida gaz sizib chiqishi tufayli yong‘in yuz berdi. Soat 19:30 da kranlar to‘liq yopilib, yong‘in bartaraf qilingan.
Ushbu holat bo‘yicha voqea joyiga soat 19:45 da “Urganchtransgaz” unitar korxonasi tasarrufidagi Qo‘ng‘irot magistral gaz quvurlari boshqarmasiga qarashli Xo‘jayli sanoat maydonchasining 15 nafar xodimi va 5 ta maxsus texnikadan iborat avariya-tiklash guruhi yetib borgan.
Avariya-tiklash ishlari davomida “Nukus-2” GTSdan tabiiy gaz bilan ta’minlanuvchi iste’molchilarga “Sho‘rko‘l” GTSi bilan ulangan halqali gaz tarmog‘i orqali tabiiy gaz yetkazib berilib, faqat “Hududgazta’minot” AJga qarashli AGTKSHlarga tabiiy gaz yetkazib berish vaqtincha to‘xtatilgan.
Gaz sizib chiqish natijasida sodir bo‘lgan yong‘in oqibatida D-530 mm bo‘lgan yuqori bosimli gaz quvurining yaroqsiz holga kelgan 10 metr uzunlikdagi qismi to‘liq almashtirilgan.
Avariya-tiklash ishlari bugun soat 10:30 da yakunlandi. Soat 11:00 dan e’tiboran barcha iste’molchilarga tabiiy gaz to‘liq yetkazib berila boshlangan.
Keltirilgan noqulaylik uchun iste’molchilardan uzr so‘raymiz.
410
