“Ўзэнергоинспекция” Сурхондарё ҳудудий бўлими ходимлари томонидан кўп қаватли уйлар, аҳоли кўп тўпланадиган жойлар (бозор, савдо мажмуаси, кўнгилочар, савдо ва овқатланиш муассасалари ва ҳ.к.) ҳамда бошқа ижтимоий иқтисодий ва маданий объектларда электр энергиясидан хавфсиз фойдаланиш қоидаларига риоя этилиши бўйича ўрганишлар ўтказилиб келинмоқда. Бу ишлар 2020 йилнинг март ойига қадар давом эттирилади.
Унда махсус тайёрланган, синовдан ўтган, электр хавфсизлиги бўйича кўникмага эга бўлган масъул ходимлар мавжудлиги, электр қурилмаларининг техник ҳолати, электр таъминоти ишончлилиги бўйича тоифаси амалдаги қоидаларга мослиги каби талаблар атрофлича ўрганилмоқда.
Хусусан, Сурхондарё вилояти кўп тармоқли марказий шифохонасида трансформатор жорий таъмирланмаганлиги, кабел учликларсиз уланганлиги, тақсимлаш қурилмасидан чиқувчи кабеллар қизиган ва қониқарсиз техник ҳолатда эканлиги аниқланди. Шунингдек, Термиз туманида жойлашган Термиз туман тиббиёт бирлашмасида ҳудудидаги кабел линиялар ёрлиқлар билан таъминланмаган. Электр тақсимлаш қурилмаларида огоҳлантирувчи белгилар чизилмаган, механик қулфлар ўрнатилмаган. Тақсимлаш қурилмаларида ПН-2 сақлагичлар ўрнига қўлбола симлар уланганлиги аниқланган. Худди шундай ҳолатни Музробод ва Қизириқ туман тиббиёт бирлашмаларида ҳам кузатиш мумкин.
Ўрганишлар жараёнида Термиз шаҳрида жойлашган 5, 9, 15-сонли мактабларнинг 0,4 кВ ли асосий тақсимлаш қурилмасида стандарт сақлагичларнинг айримлари ўрнига қўлбола симлар ўрнатилгани ҳам таълим муассасаларида электр энергиясидан хавфсиз фойдаланишга бўлган эътиборсизликдан далолат бермоқда.
Бозорлар фаолиятида шундай ўрганишлар ўтказилганда Ангор туманида жойлашган “Ангор келажаги буюм бозори” нинг 0,4 кВли тарқатиш қурилмасидан чиқувчи кабеллар механик шикастланишдан ҳимоя қилинмаган ҳолатда “Электр қурилмалари тузилиш қоидалари”, “Электр ускуналарда хавфсизлик техникаси қоидалари” ва “Ёнғин хавфсизлик қоидалари” га зид фойдаланиб келинаётганлиги маълум бўлди. Худди шу каби ҳолат “Қизириқ деҳқон озиқ-овқат бозори” МЧЖда ҳам кузатилди.
Албатта, ҳудудий бўлими томонидан ўтказилган бу каби ўрганишлардан мақсад истъемолчиларни огоҳликка чақиришдир. Айни чоғда аниқланган камчиликларни бартараф этиш бўйича тегишли кўрсатмалар берилиб, уларнинг бажарилиши назоратга олинди ҳамда электр энергиясидан хавфсиз фойдаланиш билан биргаликда оқилона ва самарали фойдаланиш юзасидан профилактика ишлари ўтказилиб истеъмолчиларга тушунтиришлар бериб борилмоқда.
“Ўзэнергоинспекция” Сурхондарё ҳудудий бўлими
1122
