И.М. Губкин номидаги Россия нефть в газ университети (НГУ) филиалида бутун ўқув йили давомида Тошкент шаҳрида «Экология» фани доирасида ташкил қилинаётган экологик акциялар ўтказилади.
Шу кунларда институтнинг 25 талабаси шаҳарни ободонлаштириш бўйича эко-акцияда қатнашди. Тошкент кундан кунга эскирган қурилмалар, гаражлардан халос бўлиб бормоқда. Бўзсув канали қирғоғида ҳам вазият ана шундай эди: эски ёғоч қурилмалар бузиб ташланганидан сўнг ҳудуд қаровсиз ва ташландиқ ҳолатга тушиб қолган эди. Акция иштирокчилари қирғоқни чиқиндилар ва тошлардан тозалади. Каналга олиб борадиган йўл ҳам тартибга келтирилди.
Тадбирда пойтахтимизнинг «Ҳумо» хоккей клуби аъзоси Абдусамад Носиров ҳам иштирок этди. Унинг сўзларига кўра, масъулиятли мусобақадан олдин ушбу тадбир жанговор руҳини янада оширди.
Эко-акция ўтказилганидан сўнг тош ва қурилиш чиқиндилари уюлиб ётган тартибсиз жой озода қиёфага эга бўлди.
Бундай тадбирлар бутун мамлакатимиз бўйлаб йил давомида ўтказилади. Хусусан, 21 сентябрда Жаҳон озодалик куни нишонланган эди. Ўша куни кўнгиллилар табиат қўйнига чиқиб, дам олиш билан бирга ҳудудларни чиқиндилардан тозалаган. Ҳар йили республика бўйлаб хашарлар ўтказилади, дарахтлар экилиб, ҳудудлар ободонлаштирилади.
Н.Зиямуҳаммедова фотосурати.
И.М. Губкин номидаги Россия нефть ва газ
университети филиали матбуот хизмати.
915
