“Issiqlik elektr stansiyalari” AJ tizimida Vazirlar Mahkamasining 2023-yil 13-yanvardagi 13-son va 20-yanvardagi 23-son qarorlari ijrosini ta’minlash maqsadida Toshkent shahri aholisi hamda ijtimoiy soha obyektlari issiqlik ta’minotiga oid quyidagi loyihalar amalga oshirilmoqda.
Xususan:
Chilonzor tumani Oqtepa va Bog‘zor mahallalarida joylashgan 50 ta ko‘p qavatli uylar, 2 ta maktab, 3 ta maktabgacha ta’lim va 2 ta tibbiyot muassasalari uchun 22,4 Gkal issiqlik energiyasini ishlab chiqarish imkoniyatiga ega qozon hamda quvvati 4,6 MVt bo‘lgan 2 ta gazporshenli qurilmalar o‘rnatilmoqda.
Bugungi kunda 2 ta gazporshen qurilmalari, har bino uchun alohida issiqlik taqsimlash qurilmalari va issiqlik ta’minotini yopiq tizimga o‘tkazish uchun zarur bo‘lgan quvurlar tortish ishlari amalga oshirilmoqda.
Ushbu loyihani amalga oshirish maqsadida, Toshkent shahridagi issiqlik tarmoqlarining so‘nggi qismlarida joylashgan 5 ta mahalla hududida kogeneratsiya hamda gaz dvigatellarini o‘rnatish bo‘yicha “Issiqlik elektr stansiyalari” AJ va “Iltekno Ileri Teknoloji Mühendislik ve Ticaret A.Ş.” (Turkiya Respublikasi) kompaniyasi o‘rtasida hamda 6 ta mahalla hududida ushbu loyihani amalga oshirish bo‘yicha “IMAGRO” s.p.a. (Italiya Respublikasi) kompaniyasi bilan “tayyor holda topshirish” sharti asosida shartnoma imzolandi.
Shuningdek, kogeneratsion va lokal qozonlarni o‘rnatish bo‘yicha zarur bo‘ladigan maydonlar aniqlandi hamda texnik topshiriqlar ishlab chiqilib, “Issiqlikelektrloyiha” AJga loyiha hujjatlarini ishlab chiqish uchun taqdim qilindi.
Davlatimiz rahbarining joriy yil 7-9-iyun kunlari Italiyaga amalga oshirgan tashriflari doirasida o‘tkazilgan biznes forum davomida “Issiqlik elektr stansiyalari” AJ va Italiyaning «SACE» kredit agentligi o‘rtasida uchta yirik shartnoma va bitta memorandum imzolandi.
Ularga ko‘ra, jami 2263,3 mln yevroga teng 4 ta yirik loyiha, shu jumladan, Toshkent IESni modernizatsiya qilish, poytaxtning 6 ta tumanida gaz porshenli qurilma va suv isitish qozonlarini qurish loyihasi, Yunusobod tumanidagi 4-Issiqlik markazi hududida har birining quvvati 4,3 MVtga teng 24 ta gazporshenli qurilma va har birining quvvati 130 MVtga teng bo‘lgan 4 ta suv isitish qozonlarini bunyod etish ishlari amalga oshiriladi.
Memorandumga asosan esa 1-, 3-, 5-, 6-, 7-, 8-, 9-, 10-issiqlik markazlarida kogeneratsion qurilmalar barpo etish orqali poytaxt aholisini qo‘shimcha issiqlik va elektr energiyasi bilan ta’minlash imkoni yaratiladi. Mazkur loyiha ham EPC+F, ya’ni qurish va to‘liq ishga tushirish darajasida moliyalashtirish shartiga asoslangan.
Shuningdek, markazni 2023-2024-yillar kuz-qish mavsumiga tayyorlash maqsadida Shayxontohur, Uchtepa tumanlari qozonxonalari ta’mirlanmoqda. Ularni modernizatsiya qilish orqali qishgi mavsumda iste’molchilarni barqaror issiqlik energiyasi bilan ta’minlash choralari izchil davom ettirilmoqda.
Ushbu ishlarni sifatli bajarish maqsadida loyiha hujjatlarini ishlab chiqish uchun texnik topshiriqlar ishlab chiqildi va “Issiqlikelektrloyiha” AJ tomonidan loyiha-smeta hujjatlari ishlab chiqilmoqda.
E’tiborlisi, loyihalarning har biri iste’molchilarga barqaror, sifatli elektr va issiqlik energiyasi yetkazib berishga qaratilgan.
“Issiqlik elektr stansiyalari” AJ Matbuot xizmati
622
