Taʼkidlash kerakki, Markaziy Osiyo davlatlari energetika tizimi, xususan, Qirgʻiz va Oʻzbekiston Respublikalari energetika tizimi parallel ravishda ishlaydi.
Shuni hisobga olgan holda ikki mamlakat energetika kompaniyalari oʻrtasidagi kelishuvga asosan, elektr energiyasini yetkazib berish oʻzaro tovar ayirboshlash (olgan miqdori hajmida qaytarish) sharti bilan amalga oshiriladi.
Shunga asosan, 2023-yil bahor mavsumida Oʻzbekistondan Qirgʻiz Respublikasiga (ichki isteʼmol past davrda) 150 mln kVt-soat elektr energiyasi yetkazib berilgan.
Oʻz navbatida, kelishuvga asosan, ushbu hajmdagi elektr energiyasini Qirgʻiz Respublikasi Oʻzbekistonga yoz mavsumida qaytaradi. Shu bilan birga, Qirgʻiz Respublikasi mamlakatimiz qishloq xoʻjaligi uchun shu davrda Norin daryosi orqali suv yetkazib beradi.
Oʻzbekiston Respublikasi arzimagan mablagʻ evaziga Qirgʻiz Respublikasiga katta miqdorda elektr energiyasi yetkazib bergani haqida ijtimoiy tarmoqlarda tarqalgan xabarlar shu jihatdan mutlaqo asossizdir.
Energetika vazirligi Matbuot xizmati.
542
