Elektr energiyasi ishlab chiqarishda qayta tiklanuvchi energiya manbalardan foydalanish, bu borada mavjud suv salohiyatidan samarali foydalanish borasida kichik va oʻrta quvvatdagi GESlarni ishga tushirish sohadagi izlanishlarning muhim yechimidir.
Yangi GESlarning davlat – xususiy sheriklik tamoyili asosida qurilishi investorlarga keng imkoniyatlar yaratib beradi.
Oʻzbekiston Respublikasi Prezidentining 2022-yil 8-apreldagi “Tadbirkorlik muhitini yaxshilash va xususiy sektorni rivojlantirish orqali barqaror iqtisodiy oʻsish uchun shart-sharoitlar yaratish borasidagi navbatdagi islohotlar toʻgʻrisida”gi PF-101-sonli Farmoni bilan “Oʻzbekgidroenergo” AJ buyurtmachi sifatida tashabbusni oʻz zimmasiga oladi. Ushbu loyihalarning oʻz vaqtida hamda sifatli amalga oshirilishiga boshchilik qiladi va ularning nazoratini olib boradi.
Bu borada “Oʻzbekgidroenergo” AJ Oʻzbekistonda birinchi bor davlat – xususiy sheriklik asosida umumiy quvvati 46,6 MVt, yillik oʻrtacha ishlab chiqarishi 179 million kVt/soat va umumiy qiymati 106,9 million dollar boʻlgan 5 ta – “Qizildaryo”, “Suvlisoy”, “Dukentsoy”, “Qamchiq” va “Quyi Koʻksuv” GES loyihalari yagona lot sifatida investor (xususiy sherik) jalb qilish maqsadida malaka soʻrovi tenderiga (RFQ) qoʻyilishini maʼlum qiladi.
DXSH asosida qurilishi rejalashtirilgan GESlarga Jahon banki tomonidan “Institutsional salohiyatni oshirish” grant mablagʻlari hisobidan yuqori malakaga ega xorijiy maslahatchilar yoʻllandi.
Xususan, “Synergy Infrastructure and Financial Advisory Services Inc” moliyaviy maslahatchi, “Dolsar Engineering” texnik maslahatchi va “UNICASE”yuridik maslahatchi sifatida tender asosida tanlab olindi hamda ushbu kompaniyalar bilan shartnomalar imzolandi.
Mazkur kompaniyalar loyiha hujjatlarini xalqaro standartlarga muvofiqlashtirish boʻyicha ish olib boradi.
Tenderlar yagona lot orqali oʻtkazilishi loyihalarning amalga oshirilishini soddalashtirib, jarayonni optimallashtiradi va samaradorlik hamda shaffoflikni taʼminlashda qoʻl keladi.
Loyihalarning uzoq muddatli moliyaviy barqarorligi va hayotiyligini taʼminlashda, tabiiy resurslardan toʻliq foydalangan holda eng yuqori muhandislik standartlari asosida ishlab chiqilishida, qurilish jarayonining barcha jihatini huquqiy tartibga solishda xorijiy kompaniyalarning tajribasidan foydalanilishi esa investorlar faoliyatini kafolatlashga xizmat qiladi.
“Oʻzbekgidroenergo” AJ buyurtmachi sifatida mazkur loyihalarning ishga tushirilishida barcha manfaatdor mahalliy hamda xorijiy investorlarni tender savdolarida faol ishtirok etishga taklif qiladi.
Tender savdolari joriy yil avgust oyida lotga chiqarilishi rejalashtirilgan.
Jarayon xususida jamiyatning rasmiy sahifalari orqali toʻliq maʼlumot berib boriladi.
“Oʻzbekgidroenergo” AJ Axborot xizmati.
1907
