2023-2024-yillar kuz-qish mavsumi oldidan “Toshkent issiqlik markazi” korxonasining ikkita issiqlik markazida modernizatsiya va rekonstruksiya ishlari amalga oshirilmoqda. Ushbu jarayonda “O‘zbekenergota’mir” AJ bosh pudratchi sifatida ishtirok etmoqda.
Ayni paytda olib borilayotgan ishlarni o‘z muddatida va sifatli bajarish maqsadida ishlar tunu-kun tashkil etilgan.
Sir emaski, kuz-qish mavsumida aholining issiqlik energiyasiga bo‘lgan ehtiyoji yilning qolgan oylariga nisbatan sezilarli darajada oshadi. Havo harorati keskin pasayganda tabiiy gaz bilan parallel ravishda zahira yoqilg‘isi bo‘lgan mazut yordamida issiqlik energiyasi ishlab chiqarishga to‘g‘ri keladi. Bunga esa faqatgina issiqlik markazlari qozon qurilmalarini modernizatsiya qilish orqali erishiladi.
Shuni inobatga olgan holda, “O‘zbekenergota’mir” AJ mutaxassislari Toshkent issiqlik markazining Shayxontohur tumanidagi “G‘arbiy” 3-son va Uchtepa tumanidagi “Chilonzor” 5-son issiqlik markazlarining har birida 2 ta qozonni rekonstruksiya qilish orqali mazut yoqishga moslashtirish loyihasini amalga oshiryaptilar.
Ayni kungacha yer tayyorlash ishlari va mavjud eski binolarni buzish ishlari to‘liq bajarildi. Belgilangan maydon sathi ko‘tarilib, zichlash va tekislash ishlari yakunlandi. Mazut saqlash rezervuarining poydevoriga armokarkas yasalib, beton quyildi. Hozirda poydevor o‘rtasini zichlash va rezervuarlarni yasash ishlari 90 foizga bajarildi. Mazut nasoslarini o‘rnatish uchun mo‘ljallangan joy poydevorlarini quyish uchun kotlovan qazilib, beton quyish ishlari olib borilmokda.
Mazkur loyiha Vazirlar Mahkamasining 2023-yil 14-martdagi 122-F farmoyishi ijrosiga qaratilgan bo‘lib, ishlab chiqilgan maxsus reja-jadval asosida amalga oshirilmoqda.
Ta’kidlash joizki, joriy yilning 1-oktabriga qadar yakunlanishi ko‘zlangan loyihadan asosiy maqsad 2023-2024-yillar kuz-qish mavsumini barqaror o‘tkazish va bu orqali iste’molchilarning issiqlik energiyasiga bo‘lgan talabini qondirishdan iborat.
“O‘zbekenergota’mir” AJ Matbuot xizmati
580
