Joriy yil 27-iyul kuni kun.uz saytida “Energetika vazirligi AQSH va Ispaniya energiya taqchilligidan «aziyat chekayotgani» haqida g‘alati postlar e’lon qildi” nomli sarlavha ostida maqola chop etildi.
Unda “Vazirlik matbuot xizmati rus propaganda kanalidagi postga tayanib, Ispaniyada odamlar uylarini sovitish uchun muzlatkich eshiklarini ochib qo‘yayotgani haqida yozgan”, degan yondashuv bilan Energetika vazirligi axborot xizmatini nokompetentlikda ayblagan.
Biz sayt mas’ullari bilan bog‘lanib, “Bu yerdagi qaysi fakt noto‘g‘ri ekan, shuni ayta olasizmi?” degan savolni berdik.
Savolga “Bunaqa postlar vazirlik rasmiy manbasiga xos emasligida” degan mazmunda javob olindi.
So‘ng “Axborot xizmati faqat faoliyati haqida ma’lumot tarqatishga majbur” degan qoida qayerda yozilgan? Bormi o‘zi shunday qoida?” deb so‘radik. Sayt vakili bunday qoida yo‘qligini tan oldi.
Uchinchi savol esa quyidagicha bo‘ldi: “Dunyodagi qaysi OAV propaganda quroli emas? Axir har qanday OAV avvalo qaysidir dunyoqarashni yoyish uchun propaganda olib boradi-ku”. Sayt vakili tomonidan bu bo‘yicha ham vazirlik Axborot xizmatini ayblashga hech qanday asos yo‘qligi ma’lum qilindi.
Shuni alohida ta’kidlash kerakki, Energetika vazirligi Axborot xizmati o‘zining asosiy vazifasini unutib qo‘ygani yo‘q. Har kuni e’lon qilinadigan o‘rtacha 6-8 ta xabarning deyarli barchasi mamlakatimiz energetika tizimidagi yangiliklar, ro‘yobga chiqarilgan va chiqarilayotgan loyihalar, hududlarda amalga oshirilayotgan ishlarga taalluqli. Muammolar ham tashlab qo‘yilayotgani yo‘q. Ayni kunlarda elektr energiyasi yetkazib berishda vujudga kelayotgan murakkabliklar batafsil yoritib borilmoqda. Har bir bo‘layotgan avariya, qancha abonentning tarmoqdan uzilib qolgani, qancha vaqt mobaynida ulanishning ta’minlanishi, qachon ulangani haqida maksimal ravishda ma’lumot berib borilyapti.
Biroq xalqimizga dunyoning boshqa mamlakatlari energetika sohasida sodir bo‘layotgan yangiliklarni yetkazib turish, odamlarga bu kabi qiyinchiliklar, energotaqchilliklar birgina bizga xos emasligini, hattoki, dunyoning rivojlangan davlatlari ham bugungi anomal issiq sharoitidan aziyat chekayotganini ko‘rsatish noto‘g‘ri ish emas, deb hisoblaymiz.
Aslida sayt jurnalistlari ma’lumotga uning qaysi resursdan olinganiga qarab emas, faktning to‘g‘ri yoki noto‘g‘ri ekaniga ahamiyat berib yondashganlarida edi, bu kabi noo‘rin ayblovlarni ilgari surishmasdi.
Biz kun.uz xodimlari, shuningdek, boshqa jurnalist hamkasblarimizdan ham bunday ayblovlarga ehtiyotkorlik bilan yondashishlarini so‘rab qolardik.
Vazirlik Axborot xizmati jurnalistlar va blogerlar bilan doimo izchil hamkorlikda ishlashga tayyor. Qanday ma’lumot zarur bo‘lsa, bemalol bizga murojaat qilishingiz va sohaga doir istalgan masalaga oydinlik kiritib olishingiz mumkin. Oddiy aytganda, eshigimiz sizlarga hamisha ochiq.
P.S. Biz bilan suhbatdan so‘ng sayt ma’muriyati maqolaga ayrim juz’iy tuzatishlarni kiritdi.
Energetika vazirligi Axborot xizmati.
378
