Bugun, 28-iyul kuni “Kun.uz” saytida “Energetika vazirligi matbuot xizmati nega hukumat qarori talabini bajarmayapti?» sarlavhali xabar eʼlon qilindi.
Unda vazirlik rasmiy saytida va rasmiy Telegram-kanallarida davlat tilida yoritilayotgan xabar va maʼlumotlarda elektr energiyasi birliklari xato yozilayotgani iddao qilinadi.
Energetika vazirligi Axborot xizmati mazkur maqola yuzasidan quyidagilarni maʼlum qiladi:
Shuni alohida taʼkidlash kerakki, Standartlashtirish, metrologiya va sertifikatlashtirish boʻyicha davlatlararo Kengash (ISC)ning “Kattalik birliklaridan foydalanishda Davlatlararo yagona qoʻllash tizimi” yaʼni, “Davlatlararo standart” ga koʻra, elektr energiyasi birliklarini qoʻllash boʻyicha norma tasdiqlangan va mamlakatimiz tomonidan imzolangan.
Unga binoan, birliklardan xalqaro formatda – “MW, MW·h, kW, kW·h” shaklida ham, xuddi shuningdek, “MVt, MVt·soat, kVt, kV, kVt·soat” shaklida ham foydalanishga ruxsat berilgan.
Qolaversa, saytda keltirilgan Oʻzbekiston Respublikasi Vazirlar Mahkamasining 2018-yil 10-yanvardagi “Oʻzbekiston Respublikasida kattalik birliklarini qoʻllash toʻgʻrisida»gi 21-sonli qarorning 3-bandi ikkinchi xatboshisida “Oʻzbekiston Respublikasida qoʻllashga ruxsat berilgan xalqaro birliklar tizimiga kiritilmagan kattalik birliklari faqat oʻlchamning son qiymatini xalqaro birliklar tizimining kattalik birliklarida ifodalashning imkoni boʻlmaganda yoki maqsadga muvofiq boʻlmagan hollarda qoʻllaniladi”, deya belgilab qoʻyilgan.
Bundan tashqari, lotin yozuviga asoslangan oʻzbek alifbosida “W” harfining yoʻqligi bois, matn kirill alifbosiga transliteratsiya qilinganida, elektr energiyasi quvvati birligi notoʻgʻri maʼnoda oʻzgarmoqda. Bu esa odamlarni chalgʻityapti.
Misol uchun: xalqaro standartdagi “MW” (megavatt) kirill alifbosida ishlovchi saytlar va kanallar tomonidan transliteratsiya qilinganida, “megabayt” tushunchasini beradigan “MV” shaklida ifodalanmoqda. Oqibatda u elektr energiyasi quvvati birligini emas, balki kompyuterdagi maʼlumot yoki xotira miqdori uchun oʻlchov birligini bildiryapti.
Bundan tashqari, bugungi kunda qonunchilik hujjatlari ijrosini nazorat qilish va tartibga solishga masʼul tashkilot boʻlmish Adliya vazirligi resurslarida ham yuqoridagi oʻlchov birliklari “MVt, MVt·soat, kVt, kV, kVt·soat” shaklida qoʻllanmoqda.
Yuqoridagilardan kelib chiqib, Energetika vazirligi Axborot xizmati mazkur oʻlchov birliklarini ayni holatda ishlatyapti va bu sayt iddao qilganidek, Hukumat qarori talablarini bajarmaslik yoki unga nisbatan sabotaj emas.
Chunki yuqorida taʼkidlangan “Davlatlararo standart”ga koʻra, “kW•h” va “kVt•soat” dan foydalanish mumkin.
Biz sayt maʼmuriyatidan yana bir bor ayblovchi soʻzlarni tanlashga ehtiyotkor boʻlib yondashishlarini soʻraymiz.
Muallifdan esa hamsuhbatining fikrini anglamasdan turib, unga iqtibos keltirmasligini iltimos qilamiz. Chunki maqolada u voz kechishni tavsiya qilayotgan “qovun” tushirayotganlar” deyilganda, Vazirlik xodimlari emas, balki Vazirlik rasmiy kanalidan olingan postni transliteratsiya qilib, oʻlchov birligi mohiyatan oʻzgarib ketganiga ham ahamiyat bermaydigan ayrim saytlar hamda kanal yurituvchilar nazarda tutilgandi.
Energetika vazirligi Axborot xizmati esa doimgidek jurnalistlar va blogerlar bilan izchil hamkorlikda ishlashga tayyor. Qanday maʼlumot zarur boʻlsa, bemalol bizga murojaat qilishingiz va sohaga doir istalgan masalaga oydinlik kiritib olishingiz mumkin. Oddiy aytganda, eshigimiz sizlarga hamisha ochiq.
Energetika vazirligi Axborot xizmati.
401
