2023-yil 27-28-iyul kunlari Energetika vazirligi huzuridagi Qayta tiklanuvchi energiya manbalari milliy ilmiy-tadqiqot institutida AQSH Xalqaro taraqqiyot agentligi (USAID) hamda Oliy taʼlim, fan va innovatsiyalar vazirligi huzuridagi Innovatsiyalarni joriy qilish va texnologiyalar transferi Milliy ofisi bilan birgalikda hududlarning shamol salohiyatini yuqori aniqlikda oʻlchash imkonini beruvchi zamonaviy LIDAR oʻlchov qurilmasidan foydalanish boʻyicha oʻquv mashgʻuloti oʻtkazildi.
Unda Institut xodimlari, “Toshkent irrigatsiya va qishloq xoʻjaligini mexanizatsiyalash muhandislari instituti” milliy tadqiqot universiteti, Islom Karimov nomidagi Toshkent davlat texnika universiteti oʻqituvchilari hamda talabalari qatnashdi.
Ushbu oʻlchov qurilmalari Innovatsion rivojlanish vazirligiga USAID agentligining “Power the Future” dasturining texnik va institutsional koʻmagi doirasida begʻaraz taqdim etilgan.
Qurilmadan Oliy taʼlim, fan va innovatsiyalar vazirligi huzuridagi Innovatsiyalarni joriy qilish va texnologiyalar transferi Milliy ofisi hamda Energetika vazirligi huzuridagi Qayta tiklanuvchi energiya manbalari milliy ilmiy-tadqiqot instituti oʻrtasidagi oʻzaro anglashuv memorandumi doirasida institutda tadqiqotlar olib borish maqsadida foydalaniladi.
Oʻquv-trening mashgʻuloti davomida yurtimizda mavjud shamol energiya zonalari haqida va mazkur zonalarda yirik shamol elektr stansiyalarini qurish uchun shamol salohiyatini aniqlash maqsadida zarur boʻlgan LIDAR oʻlchov qurilmasini oʻrnatish, monitoring qilish, muntazam maʼlumotlarni olish hamda qayta ishlash xususiyatlari haqida batafsil maʼlumot berildi.
870
