Qator vazirlik va idoralar xodimlari Jahon bankining “Gidroenergetika sektorini rivojlantirish va davlat-xususiy sheriklik” dasturining birinchi bosqichi doirasida Sertifikatlangan davlat-xususiy sheriklik mutaxassisligi (CP3P) o‘quv-trening dasturini yakunladi.
CP3P sertifikatlash jarayoni uch bosqichdan iborat bo‘lib, uning doirasida quyidagi yo‘nalishlar o‘rganiladi: DXSh asoslari, DXSh loyihalarini tayyorlash va DXSh loyihalarini amalga oshirish. Ushbu bosqich treninglarini muvaffaqiyatli tugatgan va imtihonlardan o‘tgan mutaxassislar xalqaro tan olingan CP3P sertifikatiga ega bo‘ladilar.
CP3P dasturi Jahon banki, Xalqaro moliya korporatsiyasi (XMK - Jahon banki tarkibidagi xususiy sektorni rivojlantirishga ko‘maklashuvchi tashkilot) va boshqa yetakchi xalqaro moliya institutlari bilan hamkorlikda turli mamlakatlarda DXSh elementlari mavjud bo‘lgan loyihalarni boshqarish bo‘yicha mutaxassislarni tayyorlash uchun mo‘ljallangan. APMG International (Buyuk Britaniya) ushbu ta'lim dasturini amalga oshirish uchun javobgardir.
Yaqinda manfaatdor vazirlik va idoralar xodimlari uchun oʻtkazilgan trening Jahon banki va Oʻzbekiston hukumati oʻrtasida mamlakat gidroenergetika sohasida DXShni rivojlantirish boʻyicha kengroq hamkorlikning bir qismidir.
PPP Expertise Eurasia konsalting kompaniyasining (@ppp_uzb) APMG tomonidan akkreditatsiyadan o‘tgan trenerlar boshchiligida o‘tkazilgan trening davomida ishtirokchilar iqtisodiyotning yuqorida qayd etilgan sektorida DXSh loyihalarini tayyorlash va amalga oshirish uchun zarur bilim va ko‘nikmalarga ega bo‘ldilar.
Shuningdek, ishtirokchilar Jahon banki va XMK koʻmagida dunyoning turli mamlakatlarida gidroenergetika sohasida amalga oshirilgan DXSh loyihalari misollari bilan tanishdilar.
434
