Joriy yilning may oyida Xitoy Xalq Respublikasiga Oliy darajadagi tashrif doirasida Energetika vazirligi bilan “PowerChina International Group Limited” kompaniyasi o‘rtasida Andijon viloyatining Andijon tumanida quvvati 400 MVt bo‘lgan quyosh fotoelektr stansiyasini qurish bo‘yicha “Anglashuv memorandumi” imzolangan edi.
Shunga asosan, joriy yilning 31-iyul kuni Energetika vazirligi, Andijon viloyati hokimiyati va “PowerChina International Group Limited” kompaniyasi o‘rtasida loyihani amalga oshirishning asosiy shartlarini belgilovchi shartnomasi imzolandi. Mazkur shartnomaga muvofiq quyidagi ishlar ro‘yobga chiqariladi:
➖loyiha doirasida joriy yilning sentabr oyida qurilish ishlari boshlanishi, quyosh fotoelektr stansiyasining dastlabki 100 MVt quvvati 2024-yil 1-aprelga qadar va to‘liq quvvati 2024-yil 30-noyabrga qadar ishga tushirilishi rejalashtirilgan;
➖mazkur quyosh fotoelektr stansiyasi ishga tushgandan so‘ng yiliga 700 mln kVt·soat elektr energiyasi ishlab chiqariladi, 212 mln kub metr tabiiy gaz tejaladi va atmosferaga 294 ming tonna zararli issiqxona gazlarining chiqishi oldi olinadi.
Ta’kidlash kerakki, ushbu loyiha uchun qishloq xo‘jaligi mahsulotlarini yetishtirishda foydalanilmaydigan yer maydonlari tanlangan.
Ma’lumot uchun: “PowerChina International Group Limited” kompaniyasi 2016-yilda “Power Construction Corporation of China” tomonidan xalqaro loyihalar uchun tashkil etilgan. “PowerChina International Group Limited” bugungi kunga qadar umumiy 200 GVt quvvatga ega loyihalarni amalga oshirgan. Kompaniya 2019-yilda 50,5 mlrd AQSH dollari, 2020 yilda 58,2 mlrd AQSH dollari va 2021-yilda 69,5 mlrd AQSH dollari miqdorida aylanma mablag‘larga ega bo‘lgan.
O‘zbekiston Respublikasi
Energetika vazirligi Axborot xizmati.
837
