Joriy yilning 27-iyuldan 5-avgust kunlari davomida Oʻzbekiston Respublikasi Energetika vazirligi huzuridagi Elektr energiyasi, neft mahsulotlari va gazdan foydalanishni nazorat qilish inspeksiyasi (“Oʻzenergoinspeksiya”) hamda huquqni muhofaza qilish organlari va “Hududgaztaʼminot” AJ xodimlari bilan hamkorlikda Toshkent viloyati hamda Toshkent shahrida joylashgan avtomobillarga gaz toʻldirish kompressor shoxobchalari (AGTKSH)da tabiiy gazdan noqonuniy foydalanish holatlarini aniqlash boʻyicha tezkor tadbirlar oʻtkazildi. Jumladan:
➖Toshkent viloyatining Piskent tumanida joylashgan “Kamolot istiqlol koʻmakchisi” MCHJga qarashli 3 ta AGTKSHda oʻrnatilgan gazni hisobga olish uskunalarida nazorat qilinadigan maʼlumotlar isteʼmolchilar aralashuvi bilan qisman yoʻqotilishiga yoʻl qoʻyilganlik holati, yaʼni gazni hisobga olish uskunasining elektr taʼminoti tizimidan vaqti-vaqti bilan uzib qoʻyish yoʻli bilan isteʼmol qilingan tabiiy gaz hajmining haqiqiy koʻrsatkichlari hisobotlardan yashirib kelinganligi aniqlandi.
Yuqoridagi holatlar natijasida “Kamolot istiqlol koʻmakchisi” MCHJga qarashli 3 ta AGTKSHning sanoat tarmogʻidagi ulanish nuqtasida isteʼmol qilingan tabiiy gaz hajmi hisobini yuritish uchun oʻrnatilgan EGXUlarining elektron xotira maʼlumotlari yoʻqotilishiga yoʻl qoʻyilganligi, buning natijasida tabiiy gazdan noqonuniy foydalanilganligi yuzasidan dalolatnoma rasmiylashtirilib, “Kamolot istiqlol koʻmakchisi” MCHJ-1 shoxobchasi tomonidan qiymati 1 mlrd 302 mln 579 ming soʻmlik (1 302 579 metr kub tabiiy gaz), “Kamolot istiqlol koʻmakchisi” MCHJ-2 shoxobchasida qiymati 4 mlrd 623 mln 523 ming soʻmlik (4 623 523 metr kub tabiiy gaz) va “Kamolot istiqlol koʻmakchisi” MCHJ-3 shoxobchasida esa 1 mlrd 896 mln 573 ming soʻmlik (1 896 573 metr kub tabiiy gaz) hajmda tabiiy gazdan noqonuniy foydalanganligi aniqlandi.
➖Toshkent viloyati, Chinoz tumani, “Chinmasjid” MFYda joylashgan “Koshona poydevori” MCHJga qarashli AGTKSHda tabiiy gaz hajmini hisobga olish uchun oʻrnatilgan “AvtoPilot PRO” rusumli elektron hisoblagichga oʻrnatilgan bir marotabalik nazorat tamgʻasi qasddan buzilganligi va hisoblagichdagi manifold qismi tenglashtiruvchi joʻmraklari qisman ochiq holatdaligi (ulash tartibi boʻyicha toʻliq yopiq holatda boʻlishi kerak) aniqlandi. Bu esa, oʻz navbatida, hisoblagichdagi koʻrsatkichlarni tashqi taʼsir yordamida kamaytirib koʻrsatilishiga olib keladi.
Holat yuzasidan tegishli tartibda dalolatnoma rasmiylashtirilib, dastlabki hisob-kitoblarga asosan, 1 mlrd 907 mln 168 ming soʻmlik (1 907 168 metr kub tabiiy gaz) hajmda tabiiy gazdan noqonuniy foydalanilganligi aniqlandi.
➖ Toshkent shahri, Sergeli tumani, “Qorasuv” MFY, Xonobod koʻchasida joylashgan “Nur Ziyod fayz biznes” MCHJga qarashli AGTKSHda “AvtoPilot PRO” rusumli gaz hisobdoni oʻrganilganda, unga tashqi taʼsir koʻrsatilganligi, yaʼni hisobdon manifold qismi tenglashtiruvchi joʻmraklari ochiq holatdaligi (toʻliq yopiq holatda boʻlishi kerak) maʼlum boʻldi.
Holat yuzasidan tegishli tartibda dalolatnoma rasmiylashtirilib, dastlabki hisob-kitoblarga asosan, 1 mlrd 324 mln 800 ming soʻmlik (1 324 800 metr kub tabiiy gaz) hajmda tabiiy gazdan noqonuniy foydalanilganligi aniqlandi.
Ushbu hajmdagi tabiiy gaz oʻrtacha 6 mingta xonadonning bir yillik isteʼmolini tashkil qiladi.
Aniqlangan holatlar yuzasidan rasmiylashtirilgan hujjatlar belgilangan tartibda huquqni muhofaza etuvchi organlariga taqdim qilindi.
Hozirgi vaqtda tabiiy gazdan noqonuniy foydalanish holatlarini aniqlash boʻyicha tezkor tadbirlar davom etmoqda.
Oʻzbekiston Respublikasi
Energetika vazirligi Axborot xizmati.
966
