Energetika vazirligi huzuridagi “Oʻzenergoinspeksiya” tomonidan "Hududiy elektr tarmoqlari" AJ, "Hududgazta’minot" AJ va Bosh prokuratura xodimlari bilan hamkorlikda joylarda nazorat tadbirlari oʻtkazib kelinmoqda.
Xususan, joriy yilning iyul oyida 573 ta holatda isteʼmolchilar tomonidan tabiiy gaz va elektr energiyasidan noqonuniy foydalanish holatlari aniqlandi. Bunda 37,6 mln metr kub tabiiy gaz (28 mlrd 200 mln soʻm) va 22,8 mln kVt⋅soat elektr energiyasi (11 mlrd 800 mln soʻm) talon-toroj qilinishi natijasida tizimga keltirilgan 40 mlrd soʻm zarar undirishga qaratildi.
Noqonuniy foydalanishning eng koʻp holatlari Andijon, Samarqand, Navoiy va Toshkent viloyatlari hissasiga toʻgʻri keladi.
Ushbu hajmdagi tabiiy gaz yoz mavsumida 188 mingta xonadonning bir oylik, elektr energiyasi esa 114 mingta xonadonning bir oylik isteʼmolini tashkil qiladi.
Qoidabuzar isteʼmolchilarga nisbatan belgilangan tartibda choralar koʻrilib, tegishli hujjatlar huquqni muhofaza etuvchi organlarga taqdim qilindi.
Nazorat tadbirlari davom etmoqda.
319
