Bosh prokuratura huzuridagi Departamentning Izboskan tumani boʻlimi tomonidan oʻtkazilgan tergovga qadar tekshiruvda “B.» MCHJ rahbari X.A. koʻmir yoqilgʻisini qayta ishlash sexiga oʻrnatilgan elektr hisoblash uskunasiga tashqi taʼsir oʻtkazish orqali jami 374,4 mln soʻmlik elektr energiyasidan noqonuniy foydalanib kelganligi aniqlangan.
Shu kabi Departamentning Pastdargʻom tumani boʻlimi tomonidan oʻtkazilgan tergovga qadar tekshiruvda “Pastdargʻomtumangaz” gaz taʼminoti boʻlimi operatori K.R. oʻziga tegishli issiqxona va molxonani hech qanday hujjatsiz tijorat maqsadida umumiy foydalanishdagi tabiiy gaz tarmogʻiga oʻgʻrilik yoʻli bilan ulab, jami 237,3 mln soʻmlik gazdan noqonuniy foydalanib kelganligi aniqlangan.
Shuningdek, K.R. isteʼmolchilarning abonent raqamlaridagi mavjud qarzdorliklarni asossiz yoʻq qilib berish orqali davlat va jamiyat manfaatlariga 99,8 mln soʻm zarar yetkazgan.
Departamentning Oʻzbekiston tumani boʻlimi tomonidan DXX va IIB xodimlari bilan hamkorlikda oʻtkazilgan tezkor tadbirda fuqaro B.Yo. “Qoratepa” MFY hududidagi ohak sexini umumiy foydalanishdagi gaz tarmogʻiga oʻgʻrilik yoʻli bilan ulab, jami 168,5 mln soʻmlik tabiiy gazdan noqonuniy foydalanganligi aniqlangan.
Departamentning Zangiota tumani boʻlimi tomonidan oʻtkazilgan tergovga qadar tekshiruvda esa, fuqaro Sh.M. “Vatanparvar” MFY hududidagi savdo doʻkonini hech qanday hujjatsiz tijorat maqsadida umumiy foydalanishdagi elektr tarmogʻiga oʻgʻrilik yoʻli bilan ulab, jami 83,2 mln soʻmlik elektr energiyasidan noqonuniy foydalanganligi aniqlangan.
Mazkur holatlar yuzasidan Jinoyat kodeksining 169-moddasi (oʻgʻrilik) va 278-4 (kompyuter axborotini modifikatsiyalashtirish) bilan jinoyat ishlari qoʻzgʻatilib, tergov harakatlari oʻtkazilmoqda.
482
