Energetika vazirligi huzuridagi “O‘zenergoinspeksiya” tomonidan Bosh prokuratura Departamenti va “Hududgaz Poytaxt” GTF xodimlari bilan hamkorlikda o‘tkazilgan tezkor tadbirda Uchtepa tumani, Dilkash ko‘chasi, 2-uyda joylashgan “Y” MChJ zavodi hududida tabiiy gazdan foydalanish qoidasini buzish holati aniqlandi.
Xususan, mazkur iste’molchi tomonidan gazlashtirish uchun zarur hujjatlarni rasmiylashtirmasdan, qo‘shimcha uskuna o‘rnatgan holda va gazni hisobga olish priborining davlat qiyoslovidan o‘tkazish muddati tugaganligi hamda nosoz gaz hisobdon orqali shartnoma shartlarini buzib, muntazam holatda gazdan o‘zboshimchalik bilan foydalanib kelinganligi ma’lum bo‘ldi.
Dastlabki hisob-kitoblarga asosan gaz ta’minoti korxonasi manfaatlariga jami 1 mlrd 132 mln 741 ming 500 so‘m (1 mln 716 ming 275 metr kub) miqdorida zarar yetkazilgani aniqlandi.
Maʼlumot uchun: ushbu hajmdagi tabiiy gaz oʻrtacha 8 ming 500 ta xonadonning bir oylik isteʼmolini tashkil qiladi.
Aniqlangan holat yuzasidan rasmiylashtirilgan hujjatlar belgilangan tartibda huquqni muhofaza etuvchi organlarga taqdim qilindi.
312
